नगर जिल्हा रुग्णालयातून पूजा खेडकरांना नेत्रदिव्यांग प्रमाणपत्र मिळाले;  त्यावेळचे जिल्हा आरोग्य अधिकारी यांची चौकशी होणार

पुणे : खासगी ऑडी कारवर परवानगी नसताना लाल दिवा लावणे आणि वरिष्ठ अधिकाऱ्याच्या अॅण्टी चेंबरमध्ये स्वतःचे कार्यालय उभारल्याने राज्यभर चर्चेत असलेल्या प्रोबेशनरी आयएएस अधिकारी पूजा खेडकर यांना नगर जिल्हा शासकीय रुग्णालयातून नेत्रदिव्यांग प्रमाणपत्र देण्यात आल्याचे कळते.

या प्रकरणी आता तत्कालीन जिल्हा चिकित्सकांची चौकशी होणार असल्याची चर्चा सुरू आहे.

प्रोबेशनरी आयएएस अधिकारी पूजा खेडकर यांनी नगरच्या जिल्हा रुग्णालयातून विविध प्रमाणपत्रे घेतल्याचे अभिलेख तपासणीतून समोर आले आहे. 2018 मध्ये नेत्रदिव्यांग प्रमाणपत्र आणि 2020 मध्ये मानसिक आजारी असल्याचे प्रमाणपत्र नगर जिल्हा शासकीय रुग्णालयातून मिळाल्याचे दिसून येते.

पूजा खेडकर यांना 2021 मध्ये नेत्रदिव्यांग आणि मानसिक आजारी असल्याचे एकत्रित प्रमाणपत्र मिळाले आहे. शासकीय रुग्णालयाचे दस्तावेज तपासल्यावर हे नोंदवले असल्याचे जिल्हा शल्यचिकित्सक डॉ. संजय घोगरे यांनी सांगितले. पाथर्डी तालुक्यातील खेडकर यांनी नॉन क्रिमीलेयरचेही प्रमाणपत्र मिळविल्याचे बोलले जाते.

पूजा खेडकर यांचे वडील दिलीप खेडकर, सेवानिवृत्त सनदी अधिकारी, भालगाव येथील रहिवासी आहेत. पूजा खेडकर या दिव्यांग प्रमाणपत्राच्या आधारे केंद्रीय लोकसेवा आयोगाच्या परीक्षेतून आयएएस अधिकारी बनल्या आहेत. पुण्यात प्रशिक्षणार्थी सहाय्यक जिल्हाधिकारी म्हणून त्यांची नियुक्ती झाली होती. खासगी वाहनावर लाल दिवा आणि ‘महाराष्ट्र सरकार’ असा बोर्ड लावणे, तसेच वरिष्ठ अधिकाऱ्याच्या अॅण्टी चेंबरमध्ये स्वतःचे कार्यालय थाटणे आदी नियमबाह्य वर्तन केल्यामुळे त्यांची वाशीमला बदली करण्यात आली आहे.