पुणे: लक्ष्मण हाके यांना मद्यप्राशन प्रकरणात क्लीनचिट; मराठा आंदोलकांवर कारवाई – व्हिडिओ

पुणे: कोंढवा परिसरात ओबीसी नेते लक्ष्मण हाके यांनी मद्यप्राशन करून मराठा आंदोलकांना शिवीगाळ केल्याचा आरोप झाला आहे. हाके यांनी या आरोपावर प्रतिक्रिया देताना सांगितले की, “मी मद्यप्राशन केलं की नाही, हे पोलीस तपासून सांगतील, परंतु माझा जीव घेण्याचा प्रयत्न झाला आणि हा पूर्वनियोजित कट होता.”

लक्ष्मण हाके यांची वैद्यकीय तपासणी ससून रुग्णालयात करण्यात आली, ज्यामध्ये प्राथमिक निष्कर्षानुसार त्यांनी मद्यप्राशन केल्याचे आढळले नाही. अधिक तपासणीसाठी त्यांच्या रक्ताचे नमुने प्रयोगशाळेकडे पाठवले असून, अंतिम अहवाल येण्यासाठी आणखी काही दिवस लागणार असल्याचे सांगितले आहे.

पहा व्हिडिओ

दरम्यान, हाके यांच्या तक्रारीवरून 20 ते 25 मराठा आंदोलकांवर कोंढवा पोलीस ठाण्यात गुन्हा दाखल करण्यात आला आहे. मात्र, हाके यांच्यावर कोणताही गुन्हा नोंदवण्यात आलेला नाही. सध्या ते नागपूरला एका कार्यक्रमासाठी रवाना झाले आहेत. मराठा समाजाने ओबीसीतून आरक्षणाची मागणी केली असून, याला ओबीसी नेत्यांनी विरोध केल्यामुळे ओबीसी आणि मराठा आंदोलकांमध्ये तणाव निर्माण झाल्याचे दिसत आहे.

पुण्यातील घटनेचे तपशील:

घटनेचा व्हिडिओ सध्या सोशल मीडियावर व्हायरल होत आहे. व्हिडिओमध्ये लक्ष्मण हाके आणि त्यांचे सहकारी दिसत असून, हाके यांना सहकारी सावरण्याचा प्रयत्न करत असल्याचे दिसते. हाके यांना तत्काळ ससून रुग्णालयात नेण्यात आले. मराठा आंदोलकांनी त्यांच्या वैद्यकीय तपासणीची मागणी केली होती, तर हाके यांनी हा प्रकार आपल्याला बदनाम करण्यासाठी घडवून आणल्याचा आरोप केला आहे.

संभाजीराजेंवर टीका:

मराठा आरक्षण आंदोलनाच्या पार्श्वभूमीवर, मनोज जरांगे यांच्या आंदोलनाला संभाजीराजे छत्रपती यांनी भेट दिली होती. यावर टीका करताना लक्ष्मण हाके म्हणाले होते, “संभाजीराजे, तुम्हाला राजे म्हणायला लाज वाटते. तुम्ही छत्रपती शाहू आणि शिवरायांचे वारस नाही.” हाके यांच्या या विधानामुळे मराठा आंदोलक चांगलेच आक्रमक झाले, ज्यामुळे पुण्यातील घटना घडल्याचे मानले जात आहे.