हडपसर औद्योगिक वसाहतीत कचरा अन् बांधकाम राडारोड्याचे डम्पिंग; तक्रारींनंतरही प्रशासनाची ठोस कारवाई कधी?

पुणे | ५ नोव्हेंबर २०२६

पुण्यातील हडपसर औद्योगिक वसाहत परिसरात बेकायदा कचरा टाकणे, बांधकामाचा राडारोडा टाकणे आणि साचलेला कचरा जाळण्याचे प्रकार सातत्याने होत असल्याच्या तक्रारी समोर आल्या आहेत. या प्रकारांमुळे परिसरातील स्वच्छता, पर्यावरण आणि जवळच्या निवासी भागातील नागरिकांच्या आरोग्याचा प्रश्न निर्माण झाला असून, पुणे महानगरपालिका (PMC) कारवाईवर प्रश्नचिन्ह उपस्थित होत आहे.

या प्रकरणी पुणे महानगरपालिकेकडे तीन अधिकृत तक्रारी नोंदविण्यात आल्या आहेत. कचरा टाकण्याच्या प्रकारांसंदर्भात WA269102 आणि WA268450, तर बांधकामाचा राडारोडा टाकण्यासंदर्भात WA269339 हे तक्रार क्रमांक नोंदविण्यात आले आहेत. संबंधित वाहनांबाबतची माहितीही तक्रारींच्या माध्यमातून प्रशासनाच्या निदर्शनास आणून देण्यात आली आहे.

याशिवाय परिसरात आणखी काही वाहने कचरा टाकताना दिसल्याचे नागरिकांचे म्हणणे आहे. मात्र, त्यांचे नोंदणी क्रमांक टिपता न आल्याने सर्व वाहनांची ओळख पटविणे शक्य झालेले नाही. त्यामुळे या परिसरात कचरा टाकण्याचे प्रकार रोखण्यासाठी प्रशासनाकडून नियमित गस्त आणि देखरेख केली जाते का, असा प्रश्न उपस्थित होत आहे.

विशेष म्हणजे, परिसरात मोठ्या प्रमाणावर कचरा साचत असून तो जाळण्याचे प्रकारही वारंवार घडत असल्याची तक्रार आहे. त्यामुळे जवळच्या निवासी भागात धूर पसरत असून नागरिकांना वायुप्रदूषणाचा सामना करावा लागत आहे. कचरा आणि बांधकाम मलब्याची अनधिकृत विल्हेवाट रोखणे, सार्वजनिक जागांची स्वच्छता राखणे आणि प्रदूषण नियंत्रणात ठेवणे यासाठी संबंधित यंत्रणांनी समन्वयाने कार्यवाही करणे अपेक्षित आहे.

या पार्श्वभूमीवर पुणे महानगरपालिकेने या तक्रारींची सद्यस्थिती स्पष्ट करणे आवश्यक आहे. तक्रारींनंतर प्रत्यक्ष पाहणी करण्यात आली आहे का? संबंधित वाहनांची आणि मालकांची चौकशी झाली आहे का? दोषींवर दंडात्मक किंवा कायदेशीर कारवाई करण्यात आली आहे का? परिसरातील कचरा आणि बांधकाम राडारोडा हटविण्यात आला आहे का? या प्रश्नांची उत्तरे प्रशासनाने देणे गरजेचे आहे.

केवळ तक्रारी स्वीकारणे किंवा एकदाच स्वच्छता मोहीम राबविणे पुरेसे ठरणार नाही. बेकायदा डम्पिंग रोखण्यासाठी नियमित तपासणी, आवश्यक ठिकाणी सीसीटीव्ही किंवा देखरेख व्यवस्था, दोषींवर नियमानुसार दंडात्मक कारवाई आणि स्वच्छतेचा खर्च संबंधितांकडून वसूल करण्यासाठी ठोस यंत्रणा उभारण्याची गरज आहे.

तीन अधिकृत तक्रारींची दखल घेऊन प्रशासनाने नेमकी कोणती कार्यवाही केली? हडपसर औद्योगिक वसाहतीतील कचरा डम्पिंग, बांधकाम राडारोडा आणि कचरा जाळण्याचे प्रकार रोखण्यासाठी कालबद्ध कृती आराखडा तयार होणार का? नागरिकांना स्वच्छ आणि प्रदूषणमुक्त परिसर देण्याची जबाबदारी संबंधित यंत्रणा कधी पार पाडणार, हा कळीचा प्रश्न आहे.

— रियाज मोहिदीन शेख
संपादक / पत्रकार
Maharashtra Majha Online
https://maharashtramajhaonline.com
मो. ८३७८९५७६७४