पुणे: सह्याद्री रुग्णालयाला ‘क्लीन चिट’, पण प्रश्नांची गुंता कायमच!
पुणे : यकृत प्रत्यारोपणानंतर पती-पत्नीचा मृत्यू झाल्याने संपूर्ण राज्यात खळबळ उडाली. कुटुंबीयांचे गंभीर आरोप, पोलिसांची तक्रार, राज्याच्या आरोग्य यंत्रणेचा बडगा—सगळं एकीकडे आणि आता उच्चस्तरीय समितीचा अहवाल एकीकडे! समितीच्या मते सह्याद्री रुग्णालयाने कुठलीही चूक केलेली नाही. म्हणजे एवढा गोंधळ, दोन जीव गेले आणि उपचारात त्रुटीच नाहीत? असा सवाल नागरिक आता उघडपणे करू लागले आहेत.
१७ ऑगस्ट रोजी यकृत प्रत्यारोपणानंतर बापू कोमकर यांचे तर २२ ऑगस्टला दाता असलेल्या त्यांच्या पत्नी कामिनी कोमकर यांचे निधन झाले. कुटुंबीयांना डॉक्टरांवरील संशय गळ्यापर्यंत आला आणि पोलिसांत तक्रार दाखल झाली. त्यानंतर राज्य सरकारने डॉ. मोहम्मद रेला यांच्या अध्यक्षतेखाली आठ सदस्यीय समिती नेमली. कागदोपत्री पाहणी, कागदोपत्री चौकशी आणि कागदोपत्री निष्कर्ष—शेवटी उपचारात त्रुटी नाहीत असाच शिक्का!
६ नोव्हेंबर रोजी ९८ सदस्यीय सल्लागार समिती बैठकीनेही तसाच सूर लावला आणि २७ नोव्हेंबरपासून रुग्णालयावरील यकृत प्रत्यारोपणाची स्थगिती हटवण्यात आली. म्हणजे “सगळं ठिक आहे” असा अधिकृत घोषणा-ढोल वाजलाच.
पण मोठा प्रश्न कायम —
दोन मृत्यू झाले ते कसे? नेमकी गफलत कुठे? की कुठेच नाही? मग जबाबदारी कोणाची?
उपसंचालक डॉ. भगवान पवार यांचे वक्तव्यही अत्यंत थंड —
“उपचारात त्रुटी आढळल्या नाहीत.”
जणू दोन मृत्यू ही फक्त आकडेवारीच!
आणि सर्वात महत्त्वाचे —
पोलिसांची वैद्यकीय हलगर्जीची चौकशी मात्र अद्यापही प्रलंबित.
म्हणजे एक समिती म्हणते ‘निर्दोष’, पण दुसरी चौकशी अजून सुरू. यातून सत्य समजण्याऐवजी गोंधळच वाढतोय. कुटुंबीयांसाठी तर न्यायाचा प्रवास अधिकच दूर गेल्यासारखा.
सरकारने दिलेली क्लीन चिट खरी की फक्त रुग्णालयासाठी ‘क्लीन कवच’?
नागरिकांच्या मनातले प्रश्न अनुत्तरीतच!
—
