येरवडा मेट्रो स्टेशनवर वयोवृद्ध प्रवाशांचा छळ? डिजिटल तिकिटांचा बोजवारा; पेपर तिकीट बंद केल्याने नागरिक त्रस्त

पुणे | २५ नोव्हेंबर २०२५
येरवडा मेट्रो स्टेशनवर सोमवारी सायंकाळी घडलेल्या प्रकारामुळे पुणे मेट्रोच्या तिकीट व्यवस्थेवर पुन्हा प्रश्नचिन्ह उभे राहिले आहे. पक्षाचे संघटन सहमंत्री मनोज शेट्टी यांच्या आई आणि आज्जी तिकीट काढण्यासाठी स्टेशनवर गेल्या असता पेपर तिकीट उपलब्ध नसल्यामुळे मोठा गोंधळ निर्माण झाला.

तिकीट काउंटरवर महिला कर्मचाऱ्याने वॉट्सअ‍ॅपद्वारे डिजिटल स्वरूपात दोन तिकीट पाठविल्याचे सांगण्यात आले. मात्र संबंधित प्रवासी वयोवृद्ध आणि निरक्षर असल्याने त्यांच्याकडे फिचर फोन होता; डिजिटल तिकीट वापरणे त्यांच्यासाठी अशक्य होते. याबाबत शेट्टी यांनी मदत मागितली असता कर्मचारी भूषण शिंदे, रणजीत तावडे, जितेंद्र रामटेके आणि प्रवीण इंगळे यांनी तिकीट देण्यास नकार दिल्याचा आरोप करण्यात आला. तसेच कर्मचाऱ्यांकडून अवमानकारक वर्तन झाल्याचेही शेट्टी यांनी सांगितले.

पेपर तिकिटांची सुविधा बंद असल्याने अनेक पुणेकरांना त्रास सहन करावा लागत असल्याची तक्रार वाढत आहे. विशेषतः वरिष्ठ नागरिक, निरक्षर प्रवासी आणि फिचर फोन वापरणारे नागरिक डिजिटल तिकीट प्रणालीसमोर हतबल होताना दिसत आहेत.

या पार्श्वभूमीवर आम आदमी पार्टी, पुणे यांनी तात्काळ सर्व मेट्रो स्टेशनवर पेपर तिकिटे सुरू करण्याची मागणी केली आहे. मागणी तात्काळ मान्य न झाल्यास मेट्रो रोको आंदोलन छेडण्याचा इशाराही देण्यात आला आहे.

घटनास्थळी उपस्थित नेत्यांमध्ये
राज्य समन्वयक अमित म्हस्के,
शहर उपाध्यक्ष श्रद्धा शेट्टी,
कामगार आघाडी शहराध्यक्ष संजय कोने,
संघटन सहमंत्री मनोज शेट्टी,
युवा आघाडी सचिव ॲड. रवी वडमारे
आणि सदस्य अरुण केदारी यांचा समावेश होता.

पेपर तिकीट बंदीचे परिणाम आणि वाढते असंतोष लक्षात घेता, आता पुणे मेट्रोकडून ठोस भूमिका अपेक्षित आहे.