पुणे: लक्ष्मीनगरमध्ये भटक्या कुत्र्यांचा धुमाकूळः वृद्ध महिला आणि चिमुकल्यावर हल्ला
पुणेः शहरात भटक्या कुत्र्यांचा प्रकोप दिवसेंदिवस वाढत चालला आहे. लक्ष्मीनगर येथे एक धक्कादायक घटना घडली असून, भटक्या कुत्र्यांनी थेट एका घरात घुसून 88 वर्षीय वृद्ध महिलेवर हल्ला केला. कुत्र्याने घरात झोपलेल्या महिलेचे लचके तोडले, ज्यामुळे त्यांना गंभीर दुखापत झाली आहे. त्या सध्या ससून रुग्णालयात उपचार घेत आहेत.
दत्तवाडी परिसरातील लक्ष्मीनगर येथील संतोष कुऱ्हाडे यांच्या घराचा दरवाजा उघडा राहिल्याने, एक भटका कुत्रा घरात घुसला आणि त्यांच्या वृद्ध आईवर हल्ला केला. कुत्र्याने कपाळ आणि हातांना चावा घेतल्याने त्या गंभीर जखमी झाल्या. या घटनेमुळे परिसरात भितीचे वातावरण निर्माण झाले आहे.
तसेच, चाकण येथील कडाचीवाडी परिसरात एका चिमुकल्यावर पाच भटक्या कुत्र्यांनी हल्ला केला. या हल्ल्याचा व्हिडीओ सोशल मीडियावर व्हायरल झाला आहे, ज्यामध्ये भटक्या कुत्र्यांनी त्या चिमुकल्याला फरफटत नेल्याचे दिसत आहे. नागरिकांमध्ये भटक्या कुत्र्यांविरोधात असंतोष वाढत असून प्रशासनाने तात्काळ कारवाई करण्याची मागणी होत आहे.
