पुणे: ऑनलाईन अडचणींमुळे नागरिकांना “येरवडा क्षेत्रीय”, ई परिमंडळ कार्यालयांचे हेलपाटे; सर्व्हर डाऊनचा फटका; नागरिकांची गैरसोय वाढली
पुणे: शिधापत्रिकेसंदर्भातील ऑनलाईन कामकाज ठप्प झाल्याने नागरिकांना परिमंडळ कार्यालयांचे हेलपाटे मारण्याची वेळ आली आहे. मागील १५ दिवसांपासून सर्व्हर डाऊन असल्यामुळे शिधापत्रिकांसंदर्भातील नोंदणी, नावात बदल, पत्ता दुरुस्ती, विभक्तीकरण यांसारखी कामे रखडली आहेत. त्यामुळे सध्या शंभरहून अधिक अर्ज प्रलंबित असल्याची माहिती समोर आली आहे.
ऑनलाईन प्रक्रिया ठप्प; नागरिकांची अडचण
अन्न व नागरी पुरवठा विभागाने नागरिकांच्या सोयीसाठी शिधापत्रिकांची प्रक्रिया ऑनलाईन केली होती. यासाठी शिधापत्रिका व्यवस्थापन प्रणाली (RCMS) विकसित करण्यात आली होती. मात्र, गेल्या पंधरा दिवसांपासून संकेतस्थळावर सातत्याने अडथळे येत असल्याने नागरिकांची कामे खोळंबली आहेत.
ऑफलाईन प्रक्रियेची मागणी
ऑनलाईन प्रक्रियेत अडचणींमुळे नागरिकांना पुन्हा एकदा कार्यालयात जावे लागत आहे. मात्र, कार्यालयीन कर्मचारी ऑनलाईन प्रक्रियेचा सल्ला देत असल्याने नागरिकांच्या अडचणी अधिक वाढल्या आहेत. यामुळे शिधापत्रिकाधारकांनी पुन्हा ऑफलाईन प्रक्रिया सुरू करण्याची मागणी केली आहे.
शासकीय योजनांचा लाभ मिळण्यात अडथळे
शिधापत्रिकांच्या अडचणीमुळे विविध शासकीय योजनांचा लाभ घेणेही कठीण झाले आहे. शिधापत्रिकांच्या प्रती कागदपत्रांसाठी अनिवार्य असल्याने नागरिकांना अडथळ्यांचा सामना करावा लागत आहे, असे ऑल महाराष्ट्र फेअरप्राईज शॉपकिपर्स फेडरेशनचे खजिनदार विजय गुप्ता यांनी सांगितले.
प्रशासनाची प्रतिक्रिया
“संकेतस्थळाच्या दुरुस्तीसाठी काम सुरू आहे. प्रलंबित अर्जांचा निपटारा लवकरच करण्यात येईल,” असे अन्नधान्य वितरण व पुरवठा अधिकारी प्रशांत खताळ यांनी स्पष्ट केले आहे.
नागरिकांची अपेक्षा
ऑनलाईन प्रक्रियेत सातत्याने अडचणी येत असल्याने नागरिकांनी प्रशासनाकडे त्वरित उपाययोजनांची मागणी केली आहे. योग्य पद्धतीने सेवा सुरू होईपर्यंत पूर्वीप्रमाणे ऑफलाईन प्रक्रिया चालू ठेवावी, अशी मागणी जोर धरत आहे.
