महापालिकेच्या रखडलेल्या विकासकामांना गती मिळणार;
आचारसंहिता संपल्यानंतर साडेचारशे कोटींच्या प्रकल्पांना मुहूर्त
पुणे: विधानसभा निवडणुकीची आचारसंहिता संपल्यानंतर महापालिकेच्या रखडलेल्या विकासकामांना वेग येणार आहे. साडेचारशे कोटींच्या मंजूर प्रकल्पांपैकी अनेक कामांचे कार्यादेश आचारसंहितेमुळे थांबले होते. आता या कामांना प्रत्यक्ष सुरुवात होण्याची शक्यता आहे.
आचारसंहितेमुळे रखडली कामे
गेल्या आर्थिक वर्षाच्या पहिल्या तीन महिने लोकसभा निवडणुकीच्या आचारसंहितेत गेले होते. त्यानंतर गेल्या दीड महिन्यांपासून राज्यातील विधानसभा निवडणुकीच्या आचारसंहितेमुळे महापालिकेची मोठ्या प्रमाणावर विकासकामे ठप्प होती.
महापालिका प्रशासनाने आचारसंहितेपूर्वी साडेचारशे कोटींच्या विकासकामांना मंजुरी दिली होती. मात्र, या मंजूर प्रकल्पांपैकी अनेक कामांचे कार्यादेश देणे शक्य झाले नव्हते. आचारसंहितेमुळे स्थगित झालेली ही कामे आता तातडीने सुरू करण्यात येणार आहेत.
चार महिन्यांत काम पूर्ण करण्याचे लक्ष्य
महापालिकेच्या चालू अर्थसंकल्पातील विविध प्रकल्प आणि योजनाही रखडल्या होत्या. मात्र, आता आचारसंहिता संपल्यानंतर प्रशासनाने कामांची गती वाढवण्यासाठी हालचाली सुरू केल्या आहेत. महापालिकेकडे उर्वरित आर्थिक वर्षासाठी केवळ चार महिने असल्याने कामे वेळेत पूर्ण करण्यासाठी सर्व विभागप्रमुखांना प्रस्ताव सादर करण्याचे आदेश दिले आहेत.
महापालिकेची लगबग सुरू
महापालिकेच्या वित्तीय मान्यतेनुसार विकासकामे तातडीने हाती घेण्याचा आदेश संबंधित विभागप्रमुखांना देण्यात आला आहे. रखडलेले प्रकल्प वेळेत पूर्ण करण्यासाठी प्रशासनाकडून प्रयत्न सुरू असून, शहरातील नागरिकांना या कामांचा लवकरच लाभ मिळणार आहे.
