पुणे: महाराष्ट्र माझा न्युज – मुलींच्या शिक्षण आणि सक्षमीकरणासाठी कार्यरत असलेल्या लीला पूनावाला फाउंडेशनने (LPF) आपल्या कार्याच्या ३१व्या वर्षात पदार्पण केले आहे. ‘2Morrow 2Gether’ या शालेय प्रकल्पांतर्गत फाउंडेशनने ३६० विद्यार्थिनींना १० वर्षांच्या शैक्षणिक सहप्रवासाची संधी दिली आहे. या प्रकल्पाच्या पहिल्या शिष्यवृत्ती वितरण समारंभाचे आयोजन पुण्यातील नूराह-अल-बस्साम सभागृहात करण्यात आले.
या समारंभात पुणे जिल्ह्यातील विविध शाळांमधील इयत्ता ७ वी व ८ वीतील २६३ होतकरू आणि आर्थिकदृष्ट्या दुर्बल विद्यार्थिनींना शिष्यवृत्ती प्रदान करण्यात आली. या उपक्रमाचा पुढील टप्पा २१ जुलै २०२६ रोजी पुणे जिल्ह्यातील गवाडेवाडी येथे पार पडणार आहे, जिथे ग्रामीण भागातील आणखी ९७ पात्र विद्यार्थिनींना शिष्यवृत्ती दिली जाईल. अशा प्रकारे एकूण ३६० विद्यार्थिनींना पुढील १० वर्षांसाठी शैक्षणिक मदत मिळणार आहे.
सकाळ आणि सायंकाळ अशा दोन्ही सत्रांमध्ये प्रमुख पाहुणे म्हणून उदयसिंह खरात (प्रमुख – मानव संसाधन, बॉश चेसिस सिस्टिम इंडिया लिमिटेड, चाकण), नफीसा काकाजीवाला (स्थानिक मंडळ सदस्य, अंजुमन-ए-इस्लाम पॉलिटेक्निक), आयशा काझी (लीला ज्युनियर २०१३ व सहाय्यक व्यवस्थापक – विपणन, टाटा स्टील कलर्स प्रा. लि.) आणि कीर्ती येवले (लीला ज्युनियर २०१२ व सॉफ्टवेअर अभियंता, डिजीकोरस टेक्नॉलॉजीज) उपस्थित होत्या.
या कार्यक्रमास फाउंडेशनचे विश्वस्त, विविध कॉर्पोरेट भागीदार, शाळांचे मुख्याध्यापक, शिक्षक, पालक तसेच अनेक हितचिंतक मोठ्या संख्येने उपस्थित होते.
यावेळी पद्मश्री लीला पूनावाला म्हणाल्या, “शिष्यवृत्ती हा प्रवासाचा शेवट नसून, प्रत्येक मुलीला तिच्या संपूर्ण क्षमतेपर्यंत पोहोचण्याची संधी देणारी नवी सुरुवात आहे.” त्या पुढे म्हणाल्या की, “एका मुलीचे शिक्षण केवळ तिचे आयुष्यच घडवत नाही, तर तिचे कुटुंब, समाज आणि पुढील पिढ्यांचे भविष्यही अधिक सक्षम बनवते.”
