पुणे: ‘कोहिनूर हॉटेल’च्या मालकाकडे १८ कोटींची खंडणी; लष्कर पोलीस ठाण्यात गुन्हा दाखल
पुणे : शहरातील प्रसिद्ध कोहिनूर हॉटेलच्या मालकाकडे तब्बल १८ कोटी रुपयांची खंडणी मागण्यात आल्याचा धक्कादायक प्रकार उघडकीस आला आहे. या प्रकरणी लष्कर पोलीस ठाण्यात गुन्हा दाखल झाला आहे.
फिर्यादी अली अलीअबकर जाफरी (६४) यांनी दिलेल्या माहितीनुसार, ते भारतीय नागरिक नसून काही जणांनी त्यांच्याविरोधात पोलिस व निवडणूक अधिकाऱ्यांकडे बनावट दस्तऐवजांच्या आधारे भारतात राहत असल्याचा अर्ज दाखल केला होता. हा अर्ज मागे घेण्यासाठी आरोपीकडून १८ कोटी रुपयांची खंडणी मागण्यात आली.
पैसे न दिल्यास “पोलिसांमार्फत त्रास देऊ, तुमची मालमत्ता कशी विकते ते पाहू” अशी धमकीही दिल्याचा उल्लेख फिर्यादीत करण्यात आला आहे.
हा प्रकार एम. जी. रोडवरील अकबर रेडियन प्लाझा येथील ऑफिस क्र. २०३ व २०४ येथे २०२४ पासून आजतागायत सुरू असल्याचे सांगितले जाते.
या प्रकरणी समीर मोतीलाल मुजुमदार (४९, रा. पदमजी पार्क, नाना पेठ) याच्यावर भा.दा.वि. कलम ३०८(२)(३), ३५१(२)(३) अन्वये गुन्हा नोंदवण्यात आला आहे.
