पुण्यात महापालिका निवडणुकीच्या पार्श्वभूमीवर वाहतूक बदल; पर्यायी मार्गांचा वापर करण्याचे आवाहन

पुणे – महापालिका निवडणुकीच्या पार्श्वभूमीवर शहरातील विविध भागांमध्ये वाहतूक व्यवस्था बदलण्यात आली आहे. १४ ते १६ जानेवारीदरम्यान मतदान प्रक्रियेदरम्यान मतपेटी वाटप व मतदान केंद्र परिसरातील वाहतूक बदलण्याच्या कारणास्तव अत्यावश्यक सेवेतील वाहने वगळता इतर सर्व वाहनांना बंदी घालण्यात आली आहे.

वाहतूक विभागाचे पोलीस उपायुक्त, हिंमत जाधव यांनी सांगितले की, विमानतळ विभागात फिनिक्स मॉलमागील रस्ता वाहतुकीस बंद असेल. वाहनचालकांनी विमाननगर चौक व नगर रस्ता मार्गाचा वापर करावा.

विश्रामबाग विभागात टिळक रस्त्यावरील पूरम चौक व टिळक चौक वाहतुकीस बंद राहणार असून, वाहनचालकांनी बाजीराव रस्ता व शास्त्री रस्ता मार्गाचा वापर करावा.

दत्तवाडी विभागातील ना. सी. फडके चौक (निलायम चित्रपटगृह) व सारसबाग परिसरातील रस्ता वाहतुकीस बंद राहणार असून, बाजीराव रस्ता व अप्पा बळवंत चौक मार्गावरून वाहन चालवावे. टिळक रस्त्याकडे येणारी वाहतूक देशभक्त केशवराव जेधे चौकातून (स्वारगेट) वळविली जाईल.

हडपसर विभागात शिवसेना चौक ते साने गुरूजी मार्ग वाहतुकीस बंद राहणार आहे. वाहनचालकांनी अमरधाम, माळवाडी, डीपी रस्ता व हडपसर गाडीतळ मार्गांचा वापर करावा.

समर्थ विभागात नेहरू रस्त्यावरील पॉवर हाऊस चौक ते संत कबीर चौक व ए. डी. कॅम्प चौक ते जुना मोटार स्टंड भागात वाहतूक बदल करण्यात आली आहे. वाहनचालकांनी रास्ता पेठेतील शांताई चौक व क्वार्टर गेटमार्गे इच्छितस्थळी जाण्याचा सल्ला देण्यात आला आहे.

कोरेगाव पार्क भागात नॉर्थ मेन रस्ता व महात्मा गांधी चौक परिसरातील रस्ता बंद ठेवण्यात येणार आहे. वाहनचालकांनी कोरेगाव पार्क मुख्य चौक व एबीसी फार्ममार्गे पर्यायी मार्ग निवडावा.

वाहतूक शाखेने नागरिकांना विनंती केली आहे की, पर्यायी मार्गांचा वापर करून मतदान प्रक्रियेदरम्यान सहकार्य करावे आणि वाहतुकीच्या बदलांबाबत खबरदारी बाळगावी.

—