पुणे: नेत्यांचे नातेवाईकही ‘सेफ’ नाहीत! ससूनची दाणादाण; भाजप नेत्याचे सासरे दोन महिन्यांपासून बेपत्ता; नातेवाईकांचा अक्षरशः फुटबॉल

पुणे: शहरातील कायदा-सुव्यवस्थेवरून आधीच नागरिकांची झोप उडाली असताना, आता रुग्णालयातील ‘सुरक्षा’ आणि ‘व्यवस्थापन’ही प्रश्नचिन्हाखाली आले आहे. महापालिकेपासून मंत्रालयापर्यंत यादी लावून कामं करवून घेणारे नेते—त्यांचे नातेवाईक मात्र ससून रुग्णालयातूनच गायब! आणि दोन महिने झाले, कुणालाच ठावठिकाणा नाही.

भाजपचे शहर सरचिटणीस व माजी नगरसेवक पुष्कर तुळजापूरकर यांचे मामे सासरे प्रकाश पुरोहित हे सप्टेंबर २०२४ मध्ये ससून रुग्णालयात दाखल. श्वसनाचे गंभीर आजार, आयसीयू, उपचार… आणि मग एके दिवशी अचानक ‘गायब’!

ससूनचे उत्तर शून्य; नातेवाईकांचा ‘व्हॉट्सॲप फॉरवर्ड’सारखा फिरवफिरव
तुळजापूरकर सांगतात—“दोन महिने पासून मी सतत हेलपाटे मारतोय. या विभागातून त्या विभागात, काउंटरवरून मजल्यावर… अक्षरशः फुटबॉलच झालो.” नेत्यांची ही अवस्था असेल तर सामान्य माणसाची काय दयनीय गत होत असेल, हे अधिक सांगण्याची गरज नाही.

आयसीयूमध्ये असलेल्या प्रकाश पुरोहित यांना कुटुंबीयांना बघूही दिले नाही, माहिती तर अजिबात नाही. रुग्णालयाची तोंडी माहिती नाही, लेखी माहिती नाही, रेकॉर्ड नाही—म्हणजे एका सरकारी रुग्णालयाची व्यवस्था ‘गायब रुग्णालाही’ शोधू शकत नाही, असा आरोप उघडपणे करण्यात येतो.

ते जिवंत? मृत?—रुग्णालय मौन, कुटुंबीय हैराण
“ससूनकडून एकही कागद, एकही माहिती मिळत नाही. ते उपचार घेत आहेत का, त्यांचा मृत्यू झाला आहे का—काहीच कळत नाही,” असा थेट आरोप तुळजापूरकरांनी शासनाला पाठवलेल्या पत्रात केला आहे.

सरकारी तिजोरीतून कोट्यवधी खर्च करून चालविले जाणारे प्रसिद्ध ससून रुग्णालय—इथे रुग्ण गायब होतो आणि कोणी जबाबदार नसतो? माहिती द्यावी म्हणून लोकप्रतिनिधीला मंत्रालयाचा दरवाजा ठोठावावा लागतो?

ससूनची ‘व्यवस्था’ की ‘गोंधळ?’
शहरात गुन्हे वाढले, रुग्णालये ढासळली, प्रशासनाचे डोळेझाक… “नेत्यांचे नातेवाईकही असुरक्षित” अशी चर्चा आता खुलेआम सुरू झाली आहे. सरकारी यंत्रणेची ‘उपेक्षित’ अवस्था नेतेही मान्य करत असतील तर सामान्य नागरिकांची किती दमछाक होत असेल याची कल्पनाच नको.

आता बॉल मंत्र्यांच्या कोर्टात
तुळजापूरकर यांनी ही बाब वैद्यकीय शिक्षण मंत्री हसन मुश्रीफ व राज्यमंत्री माधुरी मिसाळ यांच्या निदर्शनास आणली आहे. आता मंत्री काय पावले उचलतात, ससून प्रशासनावर गदा येते की नाही—हे पुढील काही दिवसांत स्पष्ट होईल.

पण एक मात्र निश्चित—रुग्णालयातून रुग्ण गायब होतो, नातेवाईकांची पायपीट चालते आणि प्रशासनाला काहीच पडत नाही—हीच आजची पुण्याची दुःखान्त वास्तवकथा!