पुणे: शिवाजीनगर पोलिसांकडून बनावट नोटा छापणाऱ्या टोळीचा पर्दाफाश; २८ लाखांच्या नोटांसह पाच जण अटकेत
पुणे : शिवाजीनगर पोलिसांच्या सायबर पथकाने मोठी कामगिरी करत बनावट नोटा छापणाऱ्या टोळीचा पर्दाफाश केला आहे. या कारवाईत तब्बल २८ लाख ६६ हजार १०० रुपयांच्या बनावट नोटा, २ लाख ४ हजार रुपयांच्या अस्सल नोटा तसेच अत्याधुनिक छपाई साहित्य जप्त करण्यात आले आहे. पोलिसांनी या प्रकरणी पाच जणांना अटक केली आहे.
१७ एप्रिल रोजी कोटक महिंद्रा बँकेच्या सीडीएम मशिनमध्ये २०० रुपयांच्या ५५ बनावट नोटा जमा झाल्याचा प्रकार उघडकीस आला होता. यासंदर्भात शिवाजीनगर पोलीस ठाण्यात भारतीय दंड संहितेच्या कलम १७८, १७९, १८० अंतर्गत गुन्हा दाखल करण्यात आला होता. तांत्रिक विश्लेषणाच्या आधारे पोलीस पथकाने मनिषा स्वप्निल ठाणेकर (रा. येरवडा), भारती गवंड (रा. चिंचवड) आणि सचिन रामचंद्र यमगर (रा. गहुंजे) यांना १८ एप्रिल रोजी अटक केली.
चौकशी दरम्यान, या आरोपींनी बनावट नोटांचा मुख्य पुरवठादार नरेश भिमप्पा शेटटी (रा. लोहगाव) असल्याची माहिती दिली. पोलिसांनी नरेशच्या घरावर छापा टाकून २०० रुपयांच्या २० बंडल बनावट नोटा, ५०० रुपयांच्या २ हजार २३२ बनावट नोटा (मूल्य २२.३२ लाख रुपये), प्रिंटर, शाई, कोरे कागद आणि इतर साहित्य जप्त केले. त्याच्या कारमधूनही मोठ्या प्रमाणात बनावट नोटा आढळल्या.
याशिवाय आरोपी प्रभू गुगलजेडडीलाही पोलिसांनी अटक केली असून त्याच्याकडूनही बनावट नोटा हस्तगत करण्यात आल्या आहेत.
ही कारवाई पोलीस आयुक्त अमितेशकुमार, सहपोलिस आयुक्त रंजन शर्मा, अपर पोलीस आयुक्त प्रविण पाटील, तसेच पोलीस उपायुक्त संदीपसिंह गिल्ल यांच्या मार्गदर्शनाखाली वरिष्ठ पोलीस निरीक्षक महेश बोळकोटगी, तत्कालीन पोलीस निरीक्षक चंद्रशेखर सावंत आणि पोलीस निरीक्षक चंद्रकांत सूर्यवंशी यांच्या पथकाने केली.
—
