पुणे: येरवड्यातील भूमि अभिलेख विभागात खळबळ; भ्रष्टाचारप्रकरणी उप अधीक्षक अमरसिंह पाटील निलंबित
पुणे, २६ एप्रिल: पुणे हवेली येथील भूमि अभिलेख उप अधीक्षक अमरसिंह रामचंद्र पाटील यांच्याविरोधात येरवडा पोलीस ठाण्यात भ्रष्टाचार प्रतिबंधक कायद्याअंतर्गत गुन्हा दाखल करण्यात आला आहे. या कारवाईनंतर पाटील यांना तत्काळ प्रभावाने निलंबित करण्यात आले आहे.
प्राप्त माहितीनुसार, अमरसिंह पाटील यांच्याविरोधात कलम ७ (भ्रष्टाचार प्रतिबंधक अधिनियम), तसेच भारतीय न्याय संहिता २०२३ मधील कलम ३०८ (२), १९८ व २०१ अंतर्गत गुन्हा दाखल करण्यात आला आहे. या गंभीर प्रकरणाच्या पार्श्वभूमीवर भूमि अभिलेख विभागाने विशेष समिती गठीत करत त्यांच्या कामकाजाची सखोल चौकशी सुरू केली आहे.
महाराष्ट्र नागरी सेवा (शिस्त व अपिल) नियम १९७९ अन्वये त्यांना निलंबित करण्यात आले असून, पुढील आदेश होईपर्यंत ते शासन सेवेतून दूर राहणार आहेत. निलंबन कालावधीत त्यांचे मुख्यालय उप अधीक्षक, भूमि अभिलेख कार्यालय, लोहारा, जि. धाराशिव येथे निश्चित करण्यात आले आहे. मुख्यालय सोडण्यापूर्वी धाराशिव जिल्हा अधीक्षक यांची परवानगी घेणे बंधनकारक करण्यात आले आहे.
या प्रकारामुळे महसूल व भूमि अभिलेख विभागात खळबळ उडाली असून, राज्य सरकारने प्रशासनातील भ्रष्टाचाराविरोधात कठोर भूमिका घेतल्याचे स्पष्ट संकेत मिळाले आहेत.
