सर्वसामान्यांच्या खिशाला महागाईचा फटका! खासगी बस, शालेय वाहतूक २० ते २५ टक्क्यांनी महागणार

पुणे : आधीच महागाईने त्रस्त असलेल्या सर्वसामान्यांच्या खिशावर आता खासगी बस आणि शालेय वाहतूक दरवाढीचा अतिरिक्त भार पडण्याची शक्यता आहे. वाहनांच्या किमती, डिझेल, टायर, बॅटरी, सुटे भाग, देखभाल-दुरुस्ती, चालकांचे वेतन, विमा, टोल आणि विविध करांमध्ये वाढ झाल्याचे कारण देत बस व कारच्या भाडेदरात २० ते २५ टक्क्यांपर्यंत वाढ करण्याचा निर्णय पुणे बस अँड कार ओनर्स असोसिएशनने घेतला आहे. असोसिएशनचे अध्यक्ष राजन जुनवणे यांनी पत्रकार परिषदेत ही माहिती दिली.

पाच वर्षांनंतर दरवाढीचा निर्णय

गेल्या पाच वर्षांत बस वाहतुकीच्या दरात कोणतीही वाढ करण्यात आलेली नसल्याचे असोसिएशनने स्पष्ट केले. मात्र, या काळात वाहनांच्या किमतींसह टायर, स्पेअर पार्ट्स, देखभाल-दुरुस्ती, चालकांचे वेतन व भत्ते, विमा आणि इंधनाच्या खर्चात मोठी वाढ झाली आहे. त्यातच टोल, कर आणि विविध शासकीय नियमांशी संबंधित खर्च वाढल्याने जुन्या दरात वाहतूक सेवा देणे आर्थिकदृष्ट्या कठीण झाल्याचा दावा बसमालकांनी केला आहे.

या वाढत्या खर्चामुळे भाडेदरात सुधारणा करणे अपरिहार्य झाल्याचे असोसिएशनचे म्हणणे आहे. मात्र, या दरवाढीचा थेट परिणाम खासगी बसने प्रवास करणाऱ्या नागरिकांसह शालेय विद्यार्थ्यांच्या पालकांच्या मासिक खर्चावर होण्याची शक्यता आहे.

नव्या दरांनुसार किती वाढणार भाडे?

असोसिएशनने जाहीर केलेल्या प्रस्तावित दरांनुसार, बसच्या प्रकारानुसार प्रतिकिलोमीटर भाड्यात वाढ होणार आहे.

बसचा प्रकार| जुना दर (प्रति किमी)| नवीन दर (प्रति किमी)
१७ सीटर| ₹२३| ₹२७
२० सीटर| ₹२५| ₹३०
३२ सीटर| ₹३३| ₹३८
३५ सीटर| ₹३६| ₹४२
४० सीटर| ₹४१| ₹४५
४५ सीटर| ₹४५| ₹५५
४९ सीटर| ₹४५| ₹५५

पालकांच्या बजेटवरही परिणाम?

खासगी बस आणि शालेय वाहतुकीचे दर वाढल्यास विद्यार्थ्यांच्या वाहतूक शुल्कातही वाढ होण्याची शक्यता आहे. त्यामुळे आधीच शैक्षणिक शुल्क, शालेय साहित्य आणि इतर खर्चाचा भार सहन करणाऱ्या पालकांच्या आर्थिक नियोजनावर परिणाम होऊ शकतो. दुसरीकडे, इंधन आणि वाहनांच्या देखभालीचा खर्च वाढल्याने वाहतूक व्यावसायिकांनाही आर्थिक अडचणींचा सामना करावा लागत असल्याचे असोसिएशनने म्हटले आहे.

दरम्यान, ही दरवाढ कोणत्या तारखेपासून लागू होणार आणि शालेय वाहतुकीच्या शुल्कात प्रत्यक्ष किती वाढ होणार, याबाबत स्वतंत्र स्पष्टता आवश्यक आहे. त्यामुळे पालक आणि प्रवाशांचे लक्ष आता नव्या दरांच्या अंमलबजावणीकडे लागले आहे.