पुणे: नशेत गाडीचे धक्कादायक धाडस; टायर फुटूनही बेधुंद वेग, युवकाच्या तत्परतेने टळली दुर्घटना – व्हिडिओ
पुणे: कॅम्प परिसरात मंगळवारी रात्री उशिरा एक धक्कादायक प्रकार घडला. मद्यधुंद अवस्थेत असलेल्या एका चालकाने टायर फुटल्यानंतरही गाडीचा वेग कमी न करता अनेक किलोमीटर बेपर्वाईने वाहन चालवत पुणेकरांच्या जीवाला गंभीर धोका निर्माण केला. या संपूर्ण घटनेचा व्हिडिओही सोशल मीडियावर व्हायरल झाला आहे.
पहा व्हिडिओ
सत्यजीत सरवदे या तरुणाने परिस्थितीचे गांभीर्य ओळखून तात्काळ त्या वाहनाचा पाठलाग केला. त्यांनी सतत गाडीचा मागोवा घेत वाहतूक पोलिसांना माहिती दिली. त्यांच्या सूचनेनंतर पोलिसांनी नाकाबंदी करून अखेर आरोपीला पकडण्यात यश मिळवले. नागरिकांनी सरवदे यांच्या धाडसी कृतीचे कौतुक केले असून, “त्याच्यामुळे अनेकांचे प्राण वाचले असते,” असे स्थानिकांनी सांगितले.
घटना बंड गार्डन पोलिसांकडून शहरात नाकाबंदी सुरू असताना घडली. लायसन्स प्लेट नसलेली कार कल्याणी नगर येथून पुणे रेल्वे स्टेशनच्या दिशेने झिगझॅग पद्धतीने, अतिवेगात जाताना दिसली. कोरेगाव पार्क, कॅम्प आणि स्टेशन परिसरातही ही कार वेड्यासारखी धावत असल्याचे पोलिस तपासात स्पष्ट झाले. कारवर “पार्टी बँड” असा टॅग लावलेला होता, ज्यामुळे चालक मद्यधुंद असल्याची शक्यता अधिक बळावली.
कार थांबवल्यानंतर चालकाला ताब्यात घेऊन बंड गार्डन पोलिस ठाण्यात मद्यपान करून वाहन चालवल्याचा गुन्हा दाखल करण्यात आला आहे. पोलिसांनी वाहन जप्त केले असून चालकाचे रक्तनमुने तपासणीसाठी पाठवले आहेत.
बंड गार्डन पोलिसांनी सांगितले, “टायर फुटूनही वेगाने गाडी चालवणे हा अत्यंत गंभीर गुन्हा आहे. वेळेत कार रोखली नसती, तर मोठी दुर्घटना घडली असती.”
या घटनेनंतर शहरातील रस्ते सुरक्षा आणि मद्यधुंद वाहनचालकांवरील कारवाईबाबतचे प्रश्न पुन्हा एकदा ऐरणीवर आले आहेत.
