पुणे: आयुक्तांच्या आदेशांना पोलिसांकडूनच दुलक्ष? फिनिक्स मॉल चौक आणि खराडी बायपास परिसरात अवैध वाहतूक वाढली; नागरिकांच्या नाराजीला ऊत – व्हिडिओ

पुणे : शहरातील वाहतूक पोलिसांनी चौकाचौकांमध्ये लपून-दडून होणारी दंडात्मक कारवाई थांबवावी, असे आदेश नुकतेच पोलिस आयुक्तांनी दिले. मात्र या आदेशांची प्रत्यक्ष अंमलबजावणी होत नसल्याचा आरोप नागरिकांकडून होत असून, अनेक भागांत वाहतूक नियमांचे खुलेआम उल्लंघन सुरूच असल्याचे चित्र दिसत आहे.

विशेषतः चंदननगर, खराडवाडी, फिनिक्स मॉल चौक आणि खराडी–रामवाडी बायपास या परिसरांमध्ये अवैध प्रवासी वाहतूक आणि धोकादायक वाहनचालना वाढल्याने नागरिकांचा संताप वाढला आहे.

पहा व्हिडिओ

फिनिक्स मॉल चौकात अवैध ६-सीटर, ३-सीटरची दादागिरी

फिनिक्स मॉल चौक परिसरात अवैध रिक्षांची (६-सीटर व ३-सीटर) वाहतूक दिवसाढवळ्या सुरू असून, पोलिसांकडून कारवाई होत नसल्याचे स्थानिक नागरिकांचे म्हणणे आहे.
या वाहनचालकांकडून काही कर्मचाऱ्यांकडून ‘हप्ते’ घेतले जात असल्याचा गंभीर आरोपही नागरिकांनी केला आहे.

“अवैध रिक्षा रस्त्यात अडथळा निर्माण करतात, वाहतूक कोंडी वाढवतात; पण कारवाई मात्र शून्य!” — स्थानिक नागरिक

उपाला हॉटेल–मंत्री बिझनेस पार्क परिसरात बेकायदेशीर पार्किंगचा सुळसुळाट

उपाला हॉटेल आणि मंत्री बिझनेस पार्कसमोर फुटपाथवर, रस्त्याच्या कडेला तसेच मधोमधदेखील वाहने पार्किंग करून ठेवली जात असून, वाहतूक पोलिस मात्र याकडे दुर्लक्ष करत असल्याचा आरोप आहे.
नागरिकांनी अनेकदा तक्रारी करूनही कोणतीही तात्काळ कारवाई होत नसल्याने स्थानिकांमध्ये नाराजी आहे.

खराडी–रामवाडी बायपासवर अवजड वाहनांची धुडगूस

खराडी–रामवाडी बायपास परिसरात अवजड बांधकाम वाहने आणि खासगी प्रवासी बसेसकडून सतत नियमभंग होत असल्याचे स्थानिकांचे म्हणणे आहे.
“ही वाहने रोज नियम मोडतात, सिग्नल तोडतात, पण पोलिसांकडून कारवाई होताना दिसत नाही,” असे नागरिकांनी स्पष्ट केले.

सिग्नल तोडणाऱ्यांवर कारवाई होत असली तरी अवैध वाहनचालकांवर कारवाई शून्य असल्याने पोलिसांच्या भूमिकेवर प्रश्नचिन्ह निर्माण झाले आहे.

आयुक्तांच्या आदेशांची अंमलबजावणी कुठे?

छुप्या कारवाईवर बंदी घालणाऱ्या आयुक्तांच्या आदेशांनंतर वाहतूक व्यवस्थेत बदल होईल, अशी अपेक्षा होती. मात्र प्रत्यक्षात परिस्थितीत काहीच सुधारणा न झाल्याने नागरिकांमध्ये संभ्रम आणि नाराजी आहे.
“आदेश फक्त कागदावर नको, अंमलबजावणी रस्त्यावर दिसली पाहिजे,” अशी मागणी नागरिकांकडून होत आहे.

पुणेकरांची अपेक्षा— कडक अंमलबजावणीच वाहतूक शिस्त सुधारेल

पोलिसांची पुढील भूमिका काय असणार? अवैध वाहतूक थांबवण्यासाठी ठोस कारवाई होणार का?
याकडे पुणेकर आशेने पाहत आहेत. वाहतूक पोलिसांचा कणखरपणा आणि आदेशांची काटेकोर अंमलबजावणी यावरच शहरातील वाहतूक व्यवस्थेतील सुधारणा अवलंबून असल्याचे नागरिकांचे मत आहे.