पुणे: डीमार्ट खरेदीदारांसाठी आनंदाची बातमी: जीएसटी सुधारणा योजनेतून मोठा दिलासा; साबण-तेलापासून इलेक्ट्रॉनिक्सपर्यंत सगळं स्वस्त;

पुणे – केंद्र सरकारने नुकत्याच केलेल्या जीएसटी (वस्तू आणि सेवा कर) सुधारणा जाहीर केल्यामुळे सर्वसामान्यांना दिलासा मिळणार आहे. रोजच्या वापरातील वस्तूंपासून ते इलेक्ट्रॉनिक्सपर्यंत अनेक उत्पादनांवरचा कर कमी करण्यात आला आहे. त्यामुळे डीमार्टसारख्या मोठ्या रिटेल स्टोअर्समध्ये खरेदी करणाऱ्या ग्राहकांना थेट बचत होणार आहे.

साबण-तेल झाले स्वस्त
दैनंदिन वापरातील साबण, टूथपेस्ट, डिटर्जंट, हेअर ऑईल, टॉयलेट क्लीनर, अगरबत्ती आणि मेणबत्त्यांवरील जीएसटी १८ टक्क्यांवरून थेट ५ टक्क्यांवर आणला आहे. चहा, कॉफी आणि दूध पावडर यांसारख्या वस्तूंवरील करदेखील १२ टक्क्यांवरून ५ टक्क्यांवर कमी झाला आहे.

स्नॅक्स आणि गोड पदार्थांवरही दिलासा
चॉकलेट्स, मिठाई, बिस्किटे, नमकीन, आईस्क्रीम तसेच सॉफ्ट ड्रिंक्स यांवरही करकपात झाल्याने ग्राहकांना थेट फायदा होणार आहे. विशेषत: दिवाळी आणि इतर सणासुदीच्या खरेदीत ही बचत उपयोगी ठरणार आहे.

शैक्षणिक वस्तूंवरील कर रद्द
मॅगझिन्स, पाठ्यपुस्तके, सराव पुस्तके, चार्ट्स, नकाशे आणि स्टेशनरीवरील जीएसटी पूर्णपणे रद्द करण्यात आला आहे. अगदी इरेजरवरदेखील आता कोणताही कर लागणार नाही. यामुळे विद्यार्थ्यांच्या शैक्षणिक खर्चात मोठी बचत होईल.

इलेक्ट्रॉनिक्सवर मोठा फायदा
ग्राहकांसाठी सर्वात मोठा दिलासा म्हणजे मिक्सर, ग्राइंडर यांसारख्या इलेक्ट्रॉनिक्स वस्तूंवरील जीएसटी २८ टक्क्यांवरून १८ टक्क्यांवर आणला आहे. त्यामुळे डीमार्टमधील इलेक्ट्रॉनिक्स खरेदी स्वस्त होणार आहे.

आर्थिक ताण कमी होणार
या सुधारणांमुळे घरगुती खर्चात मोठी बचत होणार असून वार्षिक हजारो रुपयांची बचत होण्याची शक्यता आहे. सरकारच्या या निर्णयामुळे केवळ ग्राहकांनाच नव्हे तर रिटेल बाजारालाही चालना मिळेल, असा अंदाज व्यक्त होत आहे.