पुणे: नववर्ष आणि विजयस्तंभ मानवंदनेसाठी विशेष बंदोबस्ताचे आदेश; ढोल-ताशा आणि लाऊडस्पीकर वापरावर कडक नियंत्रणाचे आदेश
पुणे – नववर्षाचे स्वागत व विजयस्तंभाला मानवंदनेसाठी जिल्ह्यात मोठ्या प्रमाणावर होणाऱ्या गर्दीच्या पार्श्वभूमीवर पुणे ग्रामीण पोलीस अधीक्षक पंकज देशमुख यांनी विशेष बंदोबस्ताचे आदेश जारी केले आहेत. २५ डिसेंबर २०२४ च्या मध्यरात्रीपासून ते ७ जानेवारी २०२५ च्या मध्यरात्रीपर्यंत महाराष्ट्र पोलीस अधिनियम १९५१ च्या कलम ३६ नुसार अधिकारित पोलीस अधिकारी गर्दी नियंत्रणासाठी योग्य ती कारवाई करू शकतील.
पर्यटक व अनुयायांसाठी विशेष नियोजन
पौड, लोणावळा आणि हवेली पोलीस ठाण्याच्या हद्दीत नववर्षानिमित्त होणारी गर्दी तसेच १ जानेवारीला पेरणे फाटा येथे विजयस्तंभाला मानवंदना देण्यासाठी येणाऱ्या अनुयायांची सुरक्षितता आणि सुव्यवस्थेसाठी हा निर्णय घेतला आहे.
गर्दी व मिरवणुकांवर नियमन
पोलीस अधिकाऱ्यांना सार्वजनिक जागी गर्दी टाळण्यासाठी व मिरवणुकांच्या मार्ग व वेळांसाठी आदेश देण्याचे अधिकार देण्यात आले आहेत. रस्त्यावर किंवा सार्वजनिक ठिकाणी अडथळा होणार नाही, याची खबरदारी घेण्याची जबाबदारी त्यांच्यावर सोपविण्यात आली आहे.
ध्वनीप्रदूषणावर नियंत्रण
सार्वजनिक ठिकाणी ढोल, ताशे, शिंगे यांसारख्या वाद्यांवर नियंत्रण ठेवण्यासाठी तसेच लाऊडस्पीकरचा वापर नियमन करण्याचे अधिकारही देण्यात आले आहेत. अशा ध्वनिप्रदूषणामुळे लोकांना त्रास होणार नाही, याची काळजी घेण्यात येणार आहे.
सार्वजनिक सुव्यवस्थेसाठी आदेश
घाट, धक्के, देवालये व इतर सार्वजनिक स्थळी सुव्यवस्था राखण्यासाठी पोलीस अधिकारी योग्य ती कारवाई करतील. महाराष्ट्र पोलीस अधिनियमातील कलमे ३३, ३५, ३७ ते ४०, ४२, ४३ व ४५ नुसार दिलेल्या आदेशांचे पालन करूनच कार्यवाही केली जाईल, असेही अधिनियमात नमूद आहे.
या आदेशांमुळे नववर्ष आणि विजयस्तंभ मानवंदनेच्या कार्यक्रमात अनुयायांना व पर्यटकांना सुरक्षित व सुव्यवस्थित अनुभव मिळेल, अशी अपेक्षा आहे.
