पुणेकरांना पाणी बचतीचे आवाहन; एरंडवणेतील डी.पी. रोडवर महापालिकेच्या ठेकेदारांकडून पिण्याच्या पाण्याचा कामांसाठी वापर?

पिण्याच्या पाण्याचा कामांसाठी वापर?
नागरिकांसाठीच्या मोफत पिण्याच्या पाण्याच्या वापरावरून महापालिका प्रशासनाच्या भूमिकेवर प्रश्नचिन्ह

दिनांक : ३१ ऑक्टोबर २०२६
ठिकाण : एरंडवणे, डी.पी. रोड, म्हात्रे पूल परिसर, पुणे.

पुणे : शहरात पाणीटंचाईची परिस्थिती असताना पुणे महानगरपालिका प्रशासनाकडून नागरिकांना पाणी जपून वापरण्याचे आवाहन केले जात आहे. मात्र, दुसरीकडे महापालिकेच्या माध्यमातून नागरिकांसाठी उपलब्ध करून दिल्या जाणाऱ्या मोफत पिण्याच्या पाण्याच्या टँकरमधील पाणी ठेकेदारांकडून विविध कामांसाठी वापरले जात असल्याचा प्रकार एरंडवणे परिसरात निदर्शनास आला आहे. त्यामुळे महापालिकेच्या पाणीपुरवठा विभागाच्या कार्यपद्धतीवर प्रश्न उपस्थित होत आहेत.
म्हात्रे पूल, डी.पी. रोड, साईबाबा मंदिरासमोर, एरंडवणे परिसरात नागरिकांच्या पिण्याच्या पाण्यासाठी उपलब्ध असलेल्या टँकरमधील पाण्याचा वापर महापालिकेच्या कामांशी संबंधित ठेकेदारांकडून केला जात असल्याचे दिसून येत आहे. एकीकडे पाणीटंचाईच्या पार्श्वभूमीवर नागरिकांना पाण्याचा काटकसरीने वापर करण्याच्या सूचना दिल्या जात असताना, दुसरीकडे अशा प्रकारे पिण्याच्या पाण्याचा वापर होत असल्याने प्रशासनाच्या भूमिकेवर प्रश्नचिन्ह निर्माण झाले आहे.
नागरिकांसाठी उपलब्ध करून दिलेल्या मोफत पिण्याच्या पाण्याचा वापर ठेकेदारांना त्यांच्या कामांसाठी करण्याची परवानगी कोणी दिली? यासाठी पाणीपुरवठा विभागाची अधिकृत मंजुरी आहे का? संबंधित टँकरमधील पाण्याच्या वापराची नोंद ठेवली जाते का? तसेच या पाण्याचा वापर निर्धारित उद्देशासाठीच होत आहे की नाही, याची तपासणी कोण करणार, असे प्रश्न उपस्थित होत आहेत.
या प्रकरणात संबंधित ठेकेदारांना पाणीपुरवठा विभागाकडून परवानगी देण्यात आली आहे का, याची महापालिका प्रशासनाने स्पष्टता द्यावी. तसेच पाणीपुरवठा विभागातील संबंधित अधिकारी आणि कर्मचाऱ्यांची भूमिका काय आहे, याचीही चौकशी करण्याची मागणी होत आहे.
महापालिका आयुक्तांनी या प्रकाराची गांभीर्याने दखल घेऊन संबंधित ठेकेदारांकडून पाण्याचा वापर कोणत्या कारणासाठी आणि कोणत्या परवानगीने केला जात आहे, याची चौकशी करावी. नागरिकांसाठी उपलब्ध असलेल्या पिण्याच्या पाण्याचा अनधिकृत वापर होत असल्याचे निष्पन्न झाल्यास संबंधित ठेकेदार आणि जबाबदार अधिकाऱ्यांवर नियमानुसार कारवाई करावी, अशी मागणी होत आहे.
नागरिकांना पाणी जपून वापरण्याचे आवाहन करण्याबरोबरच महापालिका प्रशासनाने आपल्या कामांमध्ये सहभागी असलेल्या ठेकेदारांकडूनही पाण्याचा जबाबदारीने वापर होतो की नाही, यावर लक्ष ठेवणे आवश्यक आहे.

— रियाज मोहिदीन शेख
संपादक / पत्रकार
Maharashtra Majha Online
https://maharashtramajhaonline.com
मो. ८३७८९५७६७४