पुणे: भरधाव टँकरचा बळी की प्रशासनाची निष्क्रियता? मोहम्मदवाडीत १९ वर्षीय तरुणाचा मृत्यू
पुणे : शहरात भरधाव वाहनांचा कहर थांबण्याचे नाव घेत नाही, आणि पोलिस प्रशासन मात्र नेहमीप्रमाणे ‘तपास सुरू आहे’ या जुजबी उत्तरावरच समाधान मानताना दिसत आहे. मोहम्मदवाडी परिसरातील क्लाउड नाइनजवळ रविवारी सायंकाळी घडलेल्या भीषण अपघातात १९ वर्षीय आरिफ शेख या तरुणाचा मृत्यू झाला. मात्र, या घटनेने पुन्हा एकदा प्रश्न उपस्थित केला आहे—अपघातानंतरच जाग येणाऱ्या यंत्रणेला आधी का दिसत नाही धोका?
मिळालेल्या माहितीनुसार, भरधाव टँकर चालकाने दुचाकीस्वार आरिफला जोरदार धडक दिली. गंभीर जखमी अवस्थेत त्याला रुग्णालयात दाखल करण्यात आले, पण डॉक्टरांनी मृत घोषित केले. अपघातानंतर चालकाला ताब्यात घेण्याची नेहमीची ‘तत्पर’ कारवाई करण्यात आली—जणू काही यानेच सर्व प्रश्न सुटणार आहेत!
मोहम्मदवाडी परिसरात वेगमर्यादा पाळली जात नाही, वाहतूक नियंत्रणाचा अभाव आहे, आणि मोठ्या वाहनांची बेफाम धावपळ सुरूच असते, अशी तक्रार स्थानिक नागरिक वारंवार करत आहेत. मात्र, पोलिसांकडून केवळ कागदी कारवाई आणि अधूनमधून चालणाऱ्या मोहिमांपलीकडे काहीच ठोस पावले उचलली जात नसल्याचे वास्तव समोर येत आहे.
“अपघात झाल्यावर कारवाई, पण अपघात टाळण्यासाठी काय?” असा संतप्त सवाल नागरिक विचारत आहेत. प्रत्येक अपघातानंतर चालकाला ताब्यात घेणे आणि गुन्हा दाखल करणे हीच जर यंत्रणेची मर्यादा असेल, तर निष्पाप नागरिकांचे जीव असेच जात राहणार का?
काळेपडळ पोलिस पुढील तपास करत असले, तरी या घटनेमुळे शहरातील वाहतूक व्यवस्थेच्या ढिसाळपणावर पुन्हा एकदा बोट ठेवले गेले आहे. आता तरी पोलिस प्रशासन झोपेतून जागे होणार का, की आणखी एखाद्या बळीची वाट पाहणार—हा प्रश्न अनुत्तरितच आहे.
