पुण्यात गुरुवारी पाणीपुरवठा बंद; शुक्रवारी कमी दाबाने येणार पाणी
पुणे, दि. २८ ऑक्टोबर — पर्वती जलकेंद्रातून लष्कर पाणीपुरवठा केंद्राला जाणाऱ्या मुख्य जलवाहिनीतील गळती तसेच भामा आसखेड योजनेतील जलवाहिनीची दुरुस्ती करण्यात येणार असल्याने पुणे महापालिकेने गुरुवारी (दि. ३०) शहरातील अनेक भागांचा पाणीपुरवठा बंद ठेवण्याचा निर्णय घेतला आहे. तर शुक्रवारी (दि. ३१) उशिरा आणि कमी दाबाने पाणीपुरवठा होईल, अशी माहिती लष्कर पाणीपुरवठा विभागाचे अधीक्षक अभियंता विरेंद्र केळकर यांनी दिली.
दुरुस्तीमुळे लष्कर जलकेंद्रातून होणारा रामटेकडी इंडस्ट्रीयल एरिया, सय्यदनगर, हेवन पार्क, शंकर मठ, वैदूवाडी, रामनगर, आनंदनगर, हडपसर गावठाण, सातववाडी, गोंधळेनगर, ससाणेनगर, काळेपडळ, मुंढवा, माळवाडी, सोलापूर रस्ता, बी.टी. कवडे रस्ता, भीमनगर, कोरेगाव पार्क, ओरिएंट गार्डन, महंमदवाडी रस्ता उजवीकडील भाग, फुरसुंगी, उरूळी देवाची, भेकराईनगर, मंतरवाडी, बेकर हिल टाकी या परिसरांचा पाणीपुरवठा पूर्णपणे बंद राहणार आहे.
तसेच नगर रस्ता परिसरातील खराडी, आपले घर, भानगाई वस्ती, चौधरी वस्ती, एकनाथ पठारे नगर, सातव वस्ती, थिटे वस्ती, चंदननगर, बोराटेनगर, यशवंतनगर, तुकाराम नगर, वडगाव शेरी, गणेशनगर, आनंदपार्क, राजश्री कॉलनी, मतेनगर, माळवाडी, महावीरनगर या भागांनाही पाणी मिळणार नाही.
भामा आसखेड योजनेखालील शेजवळ पार्क, विडी कामगार वस्ती, साईनाथ नगर, वाढेश्वरनगर, मारूतीनगर, घरकुल सोसायटी, टेम्पो चौक, पोटेनगर, विद्यानगर, मुरलीधर सोसायटी या भागांचा पुरवठाही बंद राहील.
महापालिकेने नागरिकांना आवाहन केले आहे की, या दोन दिवसांसाठी आवश्यक पाणी साठवून ठेवावे आणि पाणी वापरात काटकसर करावी.
