शिष्यवृत्तीसाठी आता कागदपत्रांची कटकट संपली!
राज्य सरकारच्या निर्णयामुळे लाखो विद्यार्थ्यांना मोठा दिलासा

पुणे | प्रतिनिधी
शिष्यवृत्तीसाठी वारंवार कागदपत्रे सादर करावी लागणे, महाविद्यालयांकडून पडताळणीतील गोंधळ आणि त्यामुळे शिष्यवृत्ती नाकारली जाण्याची भीती — या सर्व समस्यांना आता पूर्णविराम मिळणार आहे. राज्याच्या उच्च व तंत्रशिक्षण विभागाने घेतलेल्या नव्या निर्णयामुळे लाखो विद्यार्थ्यांना दिलासा मिळणार आहे.

आता सीईटी (CET) प्रवेशावेळी सादर केलेली आणि पडताळणी झालेली सर्व कागदपत्रे थेट महाडीबीटी (MahaDBT) पोर्टलकडे पाठवली जाणार आहेत. म्हणजे विद्यार्थ्यांना शिष्यवृत्तीसाठी पुन्हा तेच कागदपत्रे सादर करण्याची गरज राहणार नाही.

एकाच ठिकाणी पडताळणी – त्रासमुक्त प्रक्रिया

राज्यात दरवर्षी सुमारे ४० ते ४२ लाख विद्यार्थी उच्च शिक्षणासाठी नोंदणी करतात, त्यापैकी जवळपास ७० टक्के विद्यार्थी शिष्यवृत्ती योजनांचा लाभ घेतात. मात्र, मागील काही वर्षांत ईडब्ल्यूएस, एसईबीसी, मागासवर्गीय आदी प्रवर्गातील विद्यार्थ्यांना कागदपत्रांतील चुका किंवा अपूर्ण पडताळणीमुळे शिष्यवृत्ती नाकारल्याच्या अनेक घटना घडल्या होत्या.

या पार्श्वभूमीवर, राज्य सरकारने तंत्रज्ञानाच्या मदतीने “एकदाच पडताळणी आणि सर्वत्र वापर” ही नवी प्रणाली विकसित करण्याचा निर्णय घेतला आहे.

सीईटी नोंदणीमध्येच अपलोड – थेट शिष्यवृत्तीशी जोड

राज्यातील सुमारे १३ ते १४ लाख विद्यार्थी दरवर्षी व्यावसायिक अभ्यासक्रमांच्या प्रवेशासाठी सीईटी सेलकडे नोंदणी करतात. या वेळी विद्यार्थी आपला प्रवर्ग नमूद करून आवश्यक कागदपत्रे अपलोड करतात.

आता या पडताळणी झालेल्या कागदपत्रांचा थेट उपयोग शिष्यवृत्तीसाठी होणार आहे.

अतिरिक्त कागदपत्रांची गरजही सीईटीमार्फतच

महाडीबीटी पोर्टलकडून आवश्यक असणारी काही अतिरिक्त कागदपत्रांची यादी सीईटी सेलकडे पाठवली जाणार असून,
येत्या शैक्षणिक वर्षापासून विद्यार्थ्यांना सीईटी नोंदणीवेळीच ही अतिरिक्त कागदपत्रे अपलोड करता येतील.
यानंतर ही सर्व कागदपत्रे थेट महाविद्यालय व महाडीबीटी पोर्टलवर उपलब्ध राहतील.

नूतनीकरण प्रक्रिया अधिक सोपी

शिष्यवृत्तीच्या पहिल्या वर्षानंतर नूतनीकरण करताना विद्यार्थ्यांना फक्त मागील वर्षाची गुणपत्रिका आणि उपस्थितीचे प्रमाणपत्र द्यावे लागेल.
यामुळे नूतनीकरण प्रक्रिया पूर्णपणे डिजिटल आणि त्रासमुक्त होईल.

विभागाचा दावा

“या निर्णयामुळे शिष्यवृत्ती कागदपत्रांच्या कारणाने नाकारण्याचे प्रकार पूर्णपणे थांबतील. विद्यार्थी आणि महाविद्यालयांचा ताण मोठ्या प्रमाणात कमी होईल,”
असं उच्च व तंत्रशिक्षण विभागाकडून सांगण्यात आलं.

थोडक्यात

शिष्यवृत्तीसाठी पुन्हा कागदपत्रे सादर करण्याची गरज नाही

सीईटी पडताळणी झालेली कागदपत्रे थेट महाडीबीटी पोर्टलकडे

लाखो विद्यार्थ्यांना दिलासा; प्रक्रिया पूर्णपणे डिजिटल

नूतनीकरणासाठी फक्त गुणपत्रिका व उपस्थिती प्रमाणपत्र पुरेसे

—