पूणे: ससूनमधील सुधारणा की दिखावा? – रुग्णसेवा अजूनही ‘आपत्कालीन’ अवस्थेतच!
पुणे – ससून रुग्णालय प्रशासनाने अपघात विभागात “गंभीर रुग्णांना तत्काळ उपचार” असा दावा केला असला, तरी प्रत्यक्षात चित्र काहीसे वेगळेच असल्याचे नागरिकांचे म्हणणे आहे. रुग्णालयाने रात्रपाळीत वरिष्ठ डॉक्टरांची नेमणूक, सीसीटीव्ही यंत्रणा, पोलिस चौकी, आणि “रुग्णसेवा हाच धर्म” अशी गोड घोषवाक्ये दिली असली, तरी रुग्ण व नातेवाइकांची धावपळ, गोंधळ, आणि प्रतीक्षा यथावतच आहे.
सुधारणा किती? अनुभव किती?
अपघात विभागात गंभीर रुग्णांना “तत्काळ उपचार” देण्याची व्यवस्था करण्यात आल्याचा दावा केला जातो, पण प्रत्यक्षात स्ट्रेचर मिळण्यास विलंब, डॉक्टरांना शोधण्याची धावपळ, आणि नोंदणी काउंटरवरील रांगा अजूनही नागरिकांना झेलाव्या लागत आहेत. “रुग्णालयात औषध साठा मुबलक आहे” अशी घोषणा फलकांवर झळकत असली, तरी रुग्णांना औषधे बाहेरून विकत घ्यावी लागत असल्याची तक्रार कायम आहे.
सीसीटीव्ही व पोलिस चौकी – सुरक्षेसाठी की देखाव्यासाठी?
रुग्णालयात अत्याधुनिक सीसीटीव्ही प्रणाली आणि पोलिस चौकी स्थापन केली गेल्याचे प्रशासन सांगते. पण रुग्णालयातील चोरी, बेशिस्त गर्दी आणि काही कर्मचाऱ्यांचा वर्तणुकीतील उद्धटपणा अजूनही थांबलेला नाही. “कॅमेरे आहेत, पण लक्ष कुणाचे आहे?” असा प्रश्न उपस्थित केला जातो.
समाजसेवा अधीक्षकांचा ‘सेवा’ अनुभव कुठे?
आर्थिकदृष्ट्या दुर्बल रुग्णांना सरकारी योजनांचा लाभ मिळावा यासाठी समाजसेवा अधीक्षकांची नेमणूक करण्यात आली आहे. पण प्रत्यक्षात फॉर्म भरणे, कागदपत्रांची पडताळणी आणि अधिकाऱ्यांना शोधणे यासाठी नातेवाइकांचे पाय झिजतात. मदतीपेक्षा अधिक ‘प्रक्रिया’ मिळते, अशी नागरिकांची व्यथा आहे.
“रुग्णसेवा हाच धर्म” की फक्त भाषणबाजी?
डॉ. यलप्पा जाधव आणि डॉ. एकनाथ पवार यांनी रुग्णसेवेचे महत्व अधोरेखित केले असले, तरी रुग्णालयातील वास्तव वेगळेच बोलते. प्रत्येक भेटीत नवे उपक्रम, पण जुन्या तक्रारी तशाच – स्वच्छतेचा अभाव, नातेवाइकांसाठी प्रतीक्षा, आणि अपुरी परिचारिका.
जनतेचा सवाल – घोषणांपेक्षा कृती कधी?
ससून रुग्णालय शहरातील गरिबांसाठी शेवटचा आधार आहे. परंतु “उपचार तत्काळ” या घोषणेच्या मागे प्रशासनिक उदासीनता लपवली गेली आहे का, असा प्रश्न पुन्हा एकदा पुढे आला आहे. सुधारणा कागदावर दिसतात, पण रुग्णांच्या नजरेत ससून अजूनही “आपत्कालीन स्थितीत”च आहे.
