पुणे महापालिकेचा पुढाकार: प्रमाणपत्रासाठी प्रतीक्षेची गरज संपली; जन्म-मृत्यू प्रमाणपत्र आता ईमेलवरही उपलब्ध
जन्म-मृत्यू प्रमाणपत्रासाठी पुणेकरांना मोठा दिलासा प्रमाणपत्र आता ईमेलवरही उपलब्ध
पुणे: पुणे महापालिकेने जन्म व मृत्यू प्रमाणपत्र मिळवण्याची प्रक्रिया अधिक सुलभ केली असून, नागरिकांना यासाठी अधिक काळ प्रतीक्षा करावी लागणार नाही. महापालिकेच्या आरोग्य विभागाने सुधारित प्रणालीची अंमलबजावणी केली असून, प्रमाणपत्र आता ईमेलवरही उपलब्ध होणार आहे, अशी माहिती सहायक आरोग्य अधिकारी डॉ. मनीषा नाईक यांनी दिली.
हॉस्पिटलद्वारे नोंदणी
डॉ. नाईक यांनी सांगितले की, आता खासगी आणि शासकीय रुग्णालयांना जन्म-मृत्यूची नोंद करण्यासाठी संस्थात्मक लॉगिन आयडी आणि पासवर्ड देण्यात आले आहेत. यामुळे रुग्णालये थेट केंद्रीय नागरी प्रणाली (सीआरएस)मध्ये नोंदणी करू शकतात. नोंदणी मंजूर करण्याची अंतिम जबाबदारी महापालिकेच्या आरोग्य विभागाकडे राहील.
ईमेलवर प्रमाणपत्राची सोय
नागरिकांनी रुग्णालयाला आपला ईमेल आयडी दिल्यास त्यांना जन्म-मृत्यू प्रमाणपत्र थेट ईमेलवर पाठवले जाईल. ज्यांना हार्ड कॉपी हवी असेल, त्यांनी संबंधित क्षेत्रीय कार्यालयात भेट देणे आवश्यक आहे. या सुविधेमुळे नागरिकांना वेळेची बचत होईल, असेही डॉ. नाईक यांनी नमूद केले.
सुधारित प्रणाली लागू
केंद्र सरकारच्या २०१९ साली लागू झालेल्या ‘सीआरएस’ प्रणालीला यावर्षी सुधारित स्वरूप दिले आहे. नोंदणीसाठी लागणाऱ्या तांत्रिक अडचणी दूर केल्यामुळे आता प्रमाणपत्र तत्काळ उपलब्ध होत आहेत. महापालिकेने १५ क्षेत्रीय कार्यालयांमधून ही सेवा पुरवली जात असल्याचे सांगण्यात आले.
नागरिकांसाठी सोयीस्कर प्रक्रिया
पूर्वी प्रमाणपत्र मिळवण्यासाठी नागरिकांना कागदपत्रे सादर करून अनेक दिवस प्रतीक्षा करावी लागत होती. मात्र, सुधारित व्यवस्थेमुळे हा कालावधी कमी झाला असून, जन्म-मृत्यू प्रमाणपत्र आता काहीच दिवसांत मिळत आहे.
महापालिकेच्या या पुढाकारामुळे नागरिकांना जन्म-मृत्यू प्रमाणपत्र मिळवण्याची प्रक्रिया सुलभ झाली आहे. आता ईमेलच्या माध्यमातून ही सेवा घरबसल्या मिळणार असल्याने नागरिकांना मोठा दिलासा मिळाला आहे.
