महापालिका आयुक्तांचा आदेश आणि पहिल्याच दिवशी झाले इतके काम! पहिल्याच दिवशी २४ टन कचऱ्याची विल्हेवाट
पुणे: पुणे महानगरपालिकेने हाती घेतलेल्या ‘सर्वंकष स्वच्छता’ मोहिमेला पहिल्याच दिवशी उत्स्फूर्त प्रतिसाद मिळाला. प्रभाग क्रमांक २० आणि २१ मध्ये तब्बल २४ टन कचरा आणि १६ टन राडारोडा हटविण्यात आला. यासोबतच बेकायदा जाहिरात फलक, बेवारस वाहने, अडथळा ठरणाऱ्या वस्तू आणि धोकादायक झाडांच्या फांद्या हटवण्यात आल्या.
महापालिकेच्या सहा विभागांचे ७६४ कर्मचारी आणि अधिकारी एकाच वेळी या मोहिमेत सहभागी झाले होते. पुणे स्टेशन परिसर, ताडीवाला रोड, बंडगार्डन अशा भागांमध्ये स्वच्छतेचे काम युद्धपातळीवर पूर्ण करण्यात आले.
स्वच्छतेचा व्यापक आढावा
कचऱ्याची विल्हेवाट: प्रभाग २० आणि २१ मध्ये २४ टन ओला, सुका व गार्डन वेस्ट कचरा उचलण्यात आला.
राडारोडा हटवणे: प्रभाग २० मध्ये ६ टन आणि प्रभाग २१ मध्ये १० टन राडारोडा काढण्यात आला.
जाहिराती फलक हटवले: ३५ बेकायदा जाहिरात फलक व १२३ फलक काढण्यात आले.
झाडांच्या फांद्या छाटल्या: ४२ झाडांच्या धोकादायक फांद्या कापण्यात आल्या.
रस्ते व पदपथ दुरुस्ती: १३० चौरस मीटर रस्ते आणि २५ चौरस मीटर पदपथाची दुरुस्ती करण्यात आली.
महापालिकेचा सुसंस्कृत उपक्रम
महापालिका आयुक्त डॉ. राजेंद्र भोसले यांच्या सूचनेनुसार विविध विभागांच्या कर्मचाऱ्यांनी एकत्र रस्त्यावर उतरून मोहिमेला गती दिली. परिमंडळ एकमध्ये ९ ते १४ डिसेंबरदरम्यान मोहिम राबवली जात आहे.
स्वच्छ पुण्याचा संकल्प
घनकचरा विभागाचे उपायुक्त संदीप कदम यांनी सांगितले की, “महापालिकेतील सहा विभागांचे कर्मचारी एकत्र काम केल्याने शहर स्वच्छतेसाठी हा उपक्रम अत्यंत फायदेशीर ठरत आहे. यामुळे शहराच्या स्वच्छतेबाबत नागरिकांत सकारात्मक संदेश जात आहे.”
सर्वंकष स्वच्छता मोहिमेची यशस्वी सुरुवात पाहता नागरिकांनीदेखील स्वच्छतेमध्ये सहकार्य करावे, असे आवाहन महापालिकेकडून करण्यात आले आहे.
