पुणे: श्रीमंतांची दारू, गरीबाचा जीव; कायदा कुणासाठी? दारू प्यायची, गाडी उडवायची आणि पैसे टाकून प्रकरण मिटवायचं? हॉटेल मालक-चालकांवर गुन्हा दाखल करा; अन्यथा रस्त्यावर – उतरणार; राजेश नायर ( RPI) – व्हिडिओ

पुणे | प्रतिनिधी
टोइट बारजवळ मद्यधुंद चालकाचा थरार; बिहारी कामगाराचा जागीच मृत्यू, हॉटेल मालकाचा पैशांच्या जोरावर ‘मॅनेज’ करण्याचा प्रयत्न.

पहा व्हिडिओ

कोरेगाव पार्क–कल्याणीनगर परिसर काही महिन्यांपूर्वी पोर्शे अपघातामुळे हादरलेला असतानाच, त्याच परिसरात पुन्हा एकदा मद्यधुंद चालकाच्या बेदरकारपणाने एका गरीब बिहारी कामगाराचा बळी घेतल्याची धक्कादायक घटना घडली आहे. ‘दारू प्यायची, गाडी उडवायची आणि नंतर पैशांच्या जोरावर प्रकरण दाबायचं’—असाच काहीसा संदेश देणारी ही घटना पुन्हा प्रश्न उपस्थित करते: कायदे फक्त गरीबांसाठीच आहेत का?

बिशप हायस्कूलच्या शेजारी असलेल्या टोइट हॉटेल–रेस्टॉरंट–बारमध्ये मद्यपानासाठी आलेला एक व्यक्ती बेधुंद अवस्थेत बाहेर पडला. त्यानंतर कार काढताना, वॉलेट पार्किंगसाठी थांबलेल्या बिहारी कामगाराला जोरदार धडक देताच त्या कामगाराचा जागीच मृत्यू झाला. दारूच्या नशेतले चाक पुन्हा एकदा गरीबाच्या जीवावर फिरले—आणि परिसरातील ‘हाय-प्रोफाइल’ शांततेला काळीमा फासला.

घटना घडताच हॉटेल मालकाने पैशांच्या जोरावर प्रकरण तात्काळ दाबण्याचा प्रयत्न केल्याचा गंभीर आरोप करण्यात येत आहे. म्हणजे अपघात झाला, माणूस मेला—आणि मग ‘सेटलमेंट’चा खेळ? हा काय न्याय?

माहिती मिळताच राजेश नायर आरपीआय कार्यकर्ते व संबंधित कार्यकर्त्यांनी घटनास्थळी धाव घेत ‘हल्लाबोल’ केला. त्यानंतर येरवडा व शास्त्रीनगरचे वरिष्ठ पोलीस निरीक्षक अंजुम बागवान यांच्याकडे निवेदन देत, बार–हॉटेलचे मालक व चालक यांच्या बेजबाबदार व हलगर्जीपणामुळे एका गरीब कामगाराचा जीव गेल्याचे निदर्शनास आणून दिले. दोषींवर तत्काळ गुन्हा दाखल न झाल्यास आंदोलन छेडण्याचा स्पष्ट इशाराही देण्यात आला आहे.

पोर्शे प्रकरणानंतरही जर धडे घेतले गेले नसतील, तर प्रश्न एकच—दारू, वेग आणि पैशांची मस्ती यांना कायद्याचा लगाम कधी बसणार? की प्रत्येक वेळी बळी ठरणार तोच—गरीब कामगार?