पुणे: राजीव गांधी रुग्णालयातील सेवांचा बोजवारा? – नागरिकांच्या तक्रारींवर महापालिकेची तातडीची बैठक; सोनोग्राफी बंद, ऑक्सिजन प्लांट निष्क्रिय – फिजिओथेरपीला उपकरणे नाहीत; येरवडा रुग्णालयातील गंभीर परिस्थिती
येरवडा : आज (२१ नोव्हेंबर २०२५) येरवडा येथील राजीव गांधी रुग्णालयातील वाढत्या अडचणींवर तोडगा काढण्यासाठी महापालिकेचे आरोग्य अधिकारी डॉ. सुनील आंधळे आणि डॉ. चकोर यांच्याशी विशेष बैठक घेण्यात आली. रुग्णालयातील सेवा, मनुष्यबळाची कमतरता आणि बंद पडलेल्या अत्यावश्यक सुविधांमुळे नागरिकांना भेडसावत असलेल्या अडचणींबाबत सविस्तर चर्चा झाली.
पहा व्हिडिओ
बैठकीत मुख्यत्वे स्थानिक महिलांच्या डिलिव्हरीसाठी त्यांना ससून व कमला नेहरू रुग्णालयात पाठवले जाते, यामागील कारणांवर प्रश्नचिन्ह उपस्थित करण्यात आले. राजीव गांधी रुग्णालयात डॉक्टर, नर्सेस व इतर स्टाफच्या कमतरतेमुळे येथे प्रसूती सेवा देण्यात अडचणी येत असल्याचे निदर्शनाला आले.
शहरी गरीब योजनेअंतर्गत मिळणारी बीपी व शुगरची औषधे वेळेवर उपलब्ध नसणे हा मुद्दाही प्रखरपणे मांडण्यात आला. अनेक कार्डधारकांना औषधांसाठी वारंवार हेलपाटे घ्यावे लागत असल्याची तक्रार करण्यात आली.
गंभीर बाब म्हणजे महापालिकेची सोनोग्राफी सेवा मागील तीन ते चार महिन्यांपासून बंद आहे. संचेती रुग्णालयामार्फत उपलब्ध असलेली फिजिओथेरपीची सेवा उपकरणे नसल्यामुळे अर्धवट ठरत आहे. आवश्यक उपकरणांची खरेदी किंवा पाठपुरावा अद्याप झालेला नसल्याचे समोर आले.
रुग्णालयात बसवण्यात आलेला ऑक्सिजन प्लांट दोनदा उद्घाटन करूनही अद्याप सुरु नसल्याची च shocking बाब बैठकीत मांडण्यात आली. स्थानिक भागातील नवजात बालकांना ऑक्सिजनची गरज भासल्यास महागडी खाजगी रुग्णालये हाच पर्याय उरत असल्याने नागरिकांवर आर्थिक ओझे वाढत असल्याचे सांगण्यात आले. ऑक्सिजन प्लांट तातडीने सुरु करावा, अशी मागणी करण्यात आली.
याशिवाय भारतरक्त डायग्नोसिसला २४ तास सेवा देण्याच्या अटीवर परवाना असूनही प्रत्यक्षात सुविधा २४ तास उपलब्ध नसल्याची तक्रार करण्यात आली. तसेच रुग्णालयात सीटी स्कॅन, ब्लड टेस्ट, सोनोग्राफी यांसाठी गोरगरीब रुग्णांकडून मनमानी दर आकारले जात असल्याचेही गंभीर आरोप बैठकीत करण्यात आले.
अधिकाऱ्यांनी तक्रारींची नोंद घेऊन आवश्यक उपाययोजना करण्याचे आश्वासन दिले. मात्र समस्या कितपत आणि किती लवकर सोडवल्या जातील, याबाबत स्थानिक नागरिकांमध्ये अनिश्चितता कायम आहे.
