Pune Hit And Run: पुण्यात पुन्हा हिट अँड रन; चारचाकीने दुचाकीस्वाराला नेलं फरफटत, अंगावर काटा आणणारा VIDEO
पिंपरी: पुण्यातील कल्याणीनगर भागात घडलेल्या अपघाताच्या घटनेनंतर शहरात एकच खळबळ माजली होती. मात्र, आता पुन्हा एकदा पिंपरी-चिंचवडमध्ये हिट अँड रनचा प्रकार समोर आला आहे. पिंपळे गुरव परिसरात ७ ऑगस्ट रोजी दुपारी बारा वाजण्याच्या सुमारास एका भरधाव चारचाकी वाहनाने दुचाकीला धडक दिली आणि दोन्ही वाहनांचा अपघात झाला.
घटनेत चारचाकी वाहनचालकाने दुचाकीस्वाराला काही फूट फरफटत नेल्याचे दिसून आले आहे. या अपघातात दुचाकीस्वार आणि एक अन्य व्यक्ती जखमी झाले असून, त्यांच्यावर एका खासगी रुग्णालयात उपचार सुरू आहेत. या घटनेचा सीसीटीव्ही फुटेज सोशल मीडियावर जोरदार व्हायरल होत आहे.
मात्र, अपघातानंतर लगेचच कोणतीही तक्रार दाखल नसल्याने पोलिसांनी ताब्यात घेतलेल्या कारचालकाला सोडून दिले होते. नंतर सीसीटीव्ही फुटेज व्हायरल झाल्यावर पोलिसांनी कारचालकाचा शोध सुरू केला आहे.
घटना नेमकी कशी घडली?
पिंपरी-चिंचवडच्या पिंपळे गुरव भागात ७ ऑगस्ट रोजी दुपारी बारा वाजण्याच्या सुमारास एका भरधाव चारचाकीने दुचाकीला धडक दिली आणि अपघात घडला. सीसीटीव्हीमध्ये दाखल झालेल्या दृश्यांमध्ये चारचाकी वाहनाने दुचाकीसह स्वाराला काही अंतर फरफटत नेल्याचे दिसत आहे. या अपघातात दोन लोक जखमी झाले आहेत आणि त्यांच्यावर खासगी रुग्णालयात उपचार सुरू आहेत.
या अपघाताच्या दिवशी पोलिसांकडे कोणतीही तक्रार दाखल न झाल्यामुळे सांगवी पोलिसांनी कारचालकाला सोडून दिले. मात्र, दुसऱ्या दिवशी गुन्हा दाखल झाल्यावर देखील पोलिसांनी कारचालकाचा शोध घेण्यात फारसा प्रयत्न केला नव्हता. तथापि, सीसीटीव्ही फुटेज व्हायरल झाल्यानंतर पोलिसांनी तत्परतेने कारचालकाचा शोध सुरू केला आहे.
