पुणे: येरवड्यात लाखोंचा गुटखा जप्त; पोलिसांची कारवाई की अचानक जाग आलेली? पण येरवड्यात हा धंदा इतका दिवस कसा काय टिकला?

पुणे – येरवडा पोलिसांनी तब्बल ₹20 लाख 70 हजार 500 किमतीचा गुटखा जप्त करून २५ वर्षीय तरुणाला अटक केली. कागदावर पाहता ही मोठी कामगिरी; पण परिसरातील नागरिकांचा मात्र एकच सवाल—“हा गोडावून इतका दिवस कोणाच्या आशीर्वादाने चालत होता?”

२४ नोव्हेंबर रोजी वरिष्ठांच्या आदेशानुसार अंमली पदार्थविरोधी मोहिम राबवित असताना गुन्हे शाखेच्या पथकाने वेद प्रोव्हिजन स्टोअर्सच्या मागील गोडावूनवर धडक टाकली. आरोपी जमनाराम उर्फ गणेश जाट याच्या ताब्यातून मोठ्या प्रमाणात तंबाखूजन्य पदार्थ सापडले. कारवाईत पोलीस निरीक्षक सुदर्शन गायकवाड, सहायक निरीक्षक नितीनकुमार नाईक आणि संपूर्ण पथकाचा सहभाग होता.

गुटखा विक्रीवर बंदी असताना लाखोंचा माल ‘गल्लीतल्या गल्लीत’ आरामात साठवला जातो आणि पोलिसांना मात्र तो फक्त मोहिम राबविली तेव्हाच दिसतो, हा योगायोग की डोळेझाक—येरवड्यात चर्चेचा विषय ठरला आहे.

आरोपीवर आयपीसी कलम 123, 223, 274, 275 तसेच सिगारेट व अन्य तंबाखुजन्य उत्पादने अधिनियम, आणि अन्न सुरक्षा मानके अधिनियमांतर्गत गुन्हा दाखल करण्याची प्रक्रिया सुरू आहे. मात्र गुन्हे दाखल होऊन काय?
गुटखा माफियांचे धंदे बंद होणार, की पुढच्या “विशेष मोहिमेपर्यंत” पुन्हा मोकळे?

कारवाई झाली हे खरं, पण येरवड्यातील नागरिकांचा प्रश्न उरतोच—
“मोहिम नसली तर गुटखा दिसतच नाही का?”