पुणे: बोगस प्रमाणपत्रांचा पर्दाफाश! झेडपीच्या ४६ शिक्षकांवर शिस्तभंगाची कारवाई; शिक्षण विभागात खळबळ
पुणे : जिल्हा परिषदेच्या शिक्षण विभागात मोठा भूकंप — बोगस दिव्यांग प्रमाणपत्रांच्या आधारे नोकरीतील सवलती, बदली आणि शासकीय लाभ घेतलेल्या तब्बल ४६ प्राथमिक शिक्षकांचा भांडाफोड झाला आहे. प्रशासनाने या सर्व शिक्षकांवर शिस्तभंगाची कारवाई सुरू केली असून, शिक्षण क्षेत्रात एकच खळबळ उडाली आहे.
फेरतपासणीत उघडकीस आली फसवणूक
शिक्षकांकडून वारंवार बोगस दिव्यांग प्रमाणपत्रांचा गैरवापर केल्याच्या तक्रारींनंतर जिल्हा परिषदेने सर्व प्रमाणपत्रांची फेरतपासणी करण्याचा निर्णय घेतला होता. पहिल्या टप्प्यात १७६ शिक्षकांची प्रमाणपत्रे आरोग्य सेवा उपसंचालक कार्यालयाकडे पडताळणीसाठी पाठविण्यात आली.
या तपासणीत १३० शिक्षकांची प्रमाणपत्रे वैध, तर उर्वरित ४६ शिक्षकांचे दिव्यांगत्व ४० टक्क्यांपेक्षा कमी असल्याचे समोर आले. त्यामुळे ते शासनाच्या कोणत्याही सवलतींसाठी अपात्र ठरले आहेत. उर्वरित काही शिक्षकांची प्रमाणपत्रे आता ससून सर्वोपचार रुग्णालयातील अधिष्ठात्यांकडे पडताळणीसाठी पाठविण्यात आली असून, अपात्र शिक्षकांची संख्या आणखी वाढण्याची शक्यता आहे.
सवलतींसाठी बनावट दिव्यांग दाखले
या शिक्षकांनी दिव्यांग प्रमाणपत्रांचा वापर करून बदली, नोकरीतील आरक्षण, प्रवास सवलती, तसेच इतर शासकीय लाभ घेतल्याचा संशय आहे. आता या सर्वांवर विभागीय किंवा खात्यांतर्गत चौकशीच्या माध्यमातून कडक कारवाई होणार आहे.
“अपात्र ठरलेल्या ४६ शिक्षकांवर शिस्तभंगाची प्रक्रिया सुरू आहे. त्यांनी कोणत्या लाभांसाठी बोगस प्रमाणपत्र वापरले, त्यानुसार चौकशी व कारवाई केली जाईल.”
— गजानन पाटील, मुख्य कार्यकारी अधिकारी, पुणे जिल्हा परिषद
शिक्षकांमध्ये धाकधूक वाढली
ही यादी जाहीर झाल्यानंतर जिल्हा परिषदेतील शिक्षकांमध्ये भीतीचे वातावरण निर्माण झाले आहे. अनेकांनी स्वतःची प्रमाणपत्रे वैध आहेत का, याची पुन्हा पडताळणी सुरू केली आहे. जिल्हा प्रशासनाने मात्र स्पष्ट केले आहे की, “फसवणूक करणाऱ्यांना कोणतीही माफी नाही.”
