पुणे: पाटील इस्टेटला आयुक्तांची भेट; ड्रेनेज व शौचालय दुरुस्तीला गती, एस.आर.ए. प्रकल्पाला ग्रीन सिग्नल – वाचा सविस्तर

पुणे : पुणे महानगरपालिकेचे आयुक्त नवल किशोर राम यांनी दिनांक 18 रोजी सकाळी पाटील इस्टेट परिसराची पाहणी केली. यावेळी त्यांनी स्थानिक नागरिकांच्या समस्या प्रत्यक्ष जाणून घेतल्या आणि तातडीने उपाययोजना करण्याचे आदेश दिले.

परिसरातील ड्रेनेज लाईन बदल, शौचालय स्वच्छता व दुरुस्ती, पाणीपुरवठा सुधारणा तसेच नवीन शौचालय उभारणी या मागण्यांवर त्यांनी विशेष लक्ष केंद्रित केले. आयुक्तांच्या सूचनेनुसार ड्रेनेज कामे व शौचालय दुरुस्तीची कामे तात्काळ सुरू करण्याचे आदेश देण्यात आले. शौचालय स्वच्छतेसंदर्भात आरोग्य विभागाला काटेकोर सूचना करण्यात आल्या असून, परिसरासाठी अतिरिक्त कर्मचारी नियुक्त करण्यावरही सकारात्मक निर्णय घेण्यात येणार आहे.

या पाहणीवेळी उपायुक्त संदीप कदम (घनकचरा व्यवस्थापन), उपायुक्त अरविंद माळी (परिमंडळ २), सहायक आयुक्त तिमय्या जागले (घोले रोड कार्यालय) यांच्यासह स्थानिक लोकप्रतिनिधी व नागरिक मोठ्या संख्येने उपस्थित होते.

यानंतर महानगरपालिकेत पाटील इस्टेट झोपडपट्टीसंदर्भात बैठक घेण्यात आली. या बैठकीस झोपडपट्टी पुनर्वसन प्राधिकरणाचे सीईओ सतीश कुमार खडके, शहर अभियंता प्रशांत वाघमारे, सीओईपीचे बिराजदार सर आणि अन्य अधिकारी उपस्थित होते.

बैठकीत पाटील इस्टेटमधील एस.आर.ए. प्रकल्प तातडीने पूर्ण करण्यासाठी सकारात्मक चर्चा झाली. यासाठी आवश्यक ती सर्व मदत महानगरपालिकेकडून करण्यात येईल, असे आश्वासन आयुक्त नवल किशोर राम यांनी दिले.


—