पुण्यात गुन्हेगारीचा जलसंपर्क?
पोलीस आदेश हवेत विरतात, अवैध धंद्यांचा धडाका मात्र कायम!

पुणे : “पोलिसांनीच संरक्षण दिलंय का?” हा संतप्त सवाल पुणेकर पुन्हा एकदा विचारायला मजबूर झाले आहेत. कारण शहरात अवैध धंद्यांचा सुकाळ थांबायचे नाव घेत नाही. स्पा सेंटरमध्ये सुरु असलेला वेश्याव्यवसाय, उघड्यावर गांजा–एमडीची विक्री, आणि त्यातून वाढलेली भाईगिरी — हे सर्व दृश्य आज पुण्यातील दैनंदिन वास्तव बनले आहे.

पोलीस आयुक्तांकडून कितीही आदेश निघाले, कारवाईचे दावे झाले, तरी शनिवार–रविवार शहरातील अनेक भाग अक्षरशः गुन्हेगारीच्या मक्तेदारीत जात असल्याचे धक्कादायक चित्र आहे.

अवैध धंद्यांचा ‘शनिवार–रविवार सेल’!

येरवडा, लक्ष्मी नगर, यशवंत नगर, गाडीतळ रोड, कल्याणी नगर — या परिसरात रात्री उघडपणे गांजा विक्रीचे व्हिडिओ व्हायरल होत असताना, पोलिस मात्र कुठे दिसत नाहीत. एका अपंग वयस्क व्यक्तीकडून ५० ग्रॅम गांजा केवळ २०० रुपयांत विकला जातोय, असे व्हिडिओत स्पष्ट दिसून येते. प्रश्न असा की — हे सर्व स्थानिक पोलिसांना दिसत नाही का?

नार्कोटिक्स विभागाने मोठ्या प्रमाणावर केलेल्या कारवायांमुळेच काही प्रकरणे उघडकीस आलीत. उलट स्थानिक पोलिसांची कारवाई नसल्याबद्दल लोकांमध्ये प्रचंड नाराजी आहे.

मसाज पार्लर की ‘बेकायदेशीर व्यापार केंद्र’?

कल्याणी नगरसह शहरातील अनेक ठिकाणी मसाज पार्लरच्या नावाखाली सुरु असलेला वेश्याव्यवसाय सर्वांना दिसतो, फक्त अधिकार्‍यांना सोडून!
संबंधित अधिकाऱ्यांकडून जाणीवपूर्वक दुर्लक्ष होत असल्याचे आरोप सर्वत्र सुरू आहेत.

भाईगिरीचे फटाके, पोलिसांचा नुसता धूर

कोयत्यांनी हल्ले करणे, दहशत दाखवणे, गँगस्टर संस्कृती वाढणे — यामागे सतत सुरळीत सुरू राहणारे अवैध धंदेच कारणीभूत असल्याची नागरिकांची ठाम भूमिका आहे.
जिथे गुन्हेगारांना उघडपणे काम करण्याची हिंमत आहे, तिथे संरक्षण कवच कोणाचं? हा प्रश्न थेट पोलिसांना उद्देशून नागरिक विचारत आहेत.

पोलिस आयुक्तांकडे ‘कारवाई’चा दावा — मैदानात मात्र शांतता!

पोलिस आयुक्तांनी कारवाई सुरू असल्याचे सांगितले तरी प्रत्यक्षात अनेक भागांमध्ये अवैध धंद्याचे साम्राज्य दिवसेंदिवस मजबूत होताना दिसते.
नागरिकांचा सूर कठोर आहे —
“इकडेही लक्ष द्या साहेब! संरक्षण कोणाला देता आणि संरक्षण कोणाला द्यायला हवं?”

पुण्यात गुन्हेगारांचे धाडस वाढतेय आणि नागरिकांचा संयम संपत चाललाय — या आधी की नकाशावर ‘सुरक्षित पुणे’ हा टॅगच गायब होईल, प्रशासनाने खऱ्या अर्थाने जागे होणे अत्यावश्यक आहे.