पुण्यात जड वाहनांचा कहर: निर्बंध फक्त कागदावर, रस्त्यावर मात्र ‘मृत्यूचे ट्रक’ धावतेच!

पुणे: शहरात नेमकं कोण चालवतंय—वाहतूक पोलिस की जड वाहनांचे ‘बेपर्वा बादशाह’? गेल्या तीन वर्षांत तब्बल २४५ पुणेकरांना जड वाहनांनी चिरडून मारलं, ही आकडेवारी वाचूनही प्रशासनाची झोप काही केल्या उडताना दिसत नाही. शहरातील प्रत्येक चौथा प्राणांतिक अपघात जड वाहनांमुळे होत असताना, पोलिसांचे निर्बंध फक्त आदेशांमध्ये दमदार आणि अंमलबजावणीत कुमकुवत दिसतात.

लोणीकंद, लोणी काळभोरसारख्या भागात रोजच्या रोज अपघातांचा धो-धो पाऊस पडत असताना ‘निर्बंध’ नावाची छत्री कुठे गेली हे अजून स्पष्ट नाही. तीन वर्षांत शहरात झालेले ९४१ मृत्यूंपैकी २४५ मृत्यू जड वाहनांखाली—हा आकडा स्वतःच ओरडत आहे की अवजड वाहतूक म्हणजे ‘चालतेबोलते संकट’.

२०२५ मध्ये किंचित घट, पण लोकांचा जीव अजूनही धोक्यात!

या वर्षी ऑक्टोबरपर्यंत मृतांची संख्या ५९. पोलिस म्हणतात निर्बंधांमुळे घट झाली. पण ५९ जीव गेलेल्या शहरात हा आनंदाचा विषय कसा काय? निर्बंधांनी जर इतकाच फरक पडणार असेल, तर मग नियंत्रण कुठे आणि अंमलबजावणी कुठे?

पोलिसांची उपाययोजना: कागदावर ५ मुद्दे, रस्त्यावर शून्य परिणाम?

जड वाहनांसाठी विशेष मार्ग

३३ रस्त्यांवर दिवसा पूर्ण बंदी

परवाने व नियम तपासणी

नियमभंग करणाऱ्यांवर कारवाई

प्राणांतिक अपघातात मालकांवर गुन्हे व वाहन जप्ती

हे सगळं वाचून एकच प्रश्न—हे उपाय फक्त अहवालातच दिसतात का?
कारण प्रत्यक्ष रस्त्यांवर तर जड वाहनं केवळ नियम नाही तर जीवदेखील मोडताना दिसतात.

तज्ञांची स्पष्ट चेतावणी — ‘निबंध पुरेसे नाहीत!’

जाणकार सांगतात की वाहतूक नियोजन, तपासणी आणि अंमलबजावणी याची पूर्णपणे शिस्तबद्ध, कठोर पातळीवर गरज आहे. पण प्रशासनाचा वेग मात्र तितकाच मंद जसा जुने ट्रक चढणीवर चढताना असतो.

संपादकीय टिप्पणी

पुण्यात जड वाहनांचे नियम मोडणारे वेगाने धावतायत… आणि प्रशासनाचा निर्णय वेग घेणार तो नेमका कधी?
तोपर्यंत शहरातील रस्ते ‘हायवे’पेक्षा ‘रिस्कवे’च जास्त वाटतात!