महापालिकेच्या दुर्लक्षामुळे पुण्यात अतिक्रमणाचा सुळसुळाट; पदपथ अतिक्रमणमुक्त करा; अन्यथा अधिकाऱ्यांचा पगार बंद करा!
पुणेकरांचा संताप: अतिक्रमणमुक्त शहरासाठी महापालिकेवर दबाव
पुणे – शहरातील रस्ते व पादचारी मार्गांवर वाढत चाललेल्या अतिक्रमणांमुळे पुणेकर त्रस्त झाले आहेत. महापालिकेच्या अतिक्रमण विभागातील अधिकाऱ्यांच्या आर्थिक हितसंबंधांमुळे योग्य ती कारवाई केली जात नाही, असा आरोप नागरिकांनी केला आहे. रस्ते व पदपथ अतिक्रमणमुक्त करण्यासाठी कठोर पावले उचलण्याची मागणी सर्व स्तरांतून होत आहे.
महापालिकेच्या निष्क्रीयतेमुळे शहरातील नागरिक, विशेषतः विद्यार्थी, महिला व ज्येष्ठ नागरिकांना मोठा त्रास सहन करावा लागत आहे. “अधिकाऱ्यांवर कारवाई करा; अन्यथा त्यांचा पगार बंद करा. याशिवाय रस्ते अतिक्रमणमुक्त होणार नाहीत,” अशा संतप्त प्रतिक्रिया पुणेकरांनी व्यक्त केल्या आहेत.
शहरातील लक्ष्मी रस्ता, बाजीराव रस्ता, शिवाजी रस्ता, कुमठेकर रस्ता आणि अप्पा बळवंत चौक यांसारख्या प्रमुख ठिकाणी अतिक्रमणांमुळे पादचारी मार्ग बंद झाले आहेत. विक्रेते आणि खाद्यपदार्थांच्या गाड्यांनी पादचारी मार्गांवर अतिक्रमण केले आहे. सिंहगड रस्त्यावर दुचाकीस्वार पादचारी मार्गांचा वापर करत असल्यामुळे चालण्यासाठी जागाच उरलेली नाही, असे नागरिकांनी निदर्शनास आणून दिले.
नो हॉकर्स झोनचीही अंमलबजावणी नाही
पुण्यातील ‘नो हॉकर्स झोन’ची अंमलबजावणी फक्त कागदावरच असल्याचे नागरिकांनी सांगितले. रस्त्यांवरील भाजीविक्रेते, टपरीवाले आणि अन्य व्यवसायिक हे पादचारी मार्गांवरच आपले अतिक्रमण पसरवत आहेत. महापालिका कारवाई करते, परंतु पुन्हा त्याच ठिकाणी अतिक्रमण होते.
आयुक्तांनी स्वतः मैदानात उतरावे
“महापालिकेचे अधिकारी व अतिक्रमणधारक यांच्यातील आर्थिक साटेलोट्यामुळे हा प्रश्‍न कायमचा सुटत नाही. आयुक्तांनी स्वतः रस्त्यावर उतरून अतिक्रमणमुक्त मोहिम राबवावी,” अशी मागणी सचिन जाधव (धायरी) यांनी केली.
पदपथ अतिक्रमणमुक्त करण्यासाठी नागरिकांचा आग्रह
शहरातील पादचारी मार्गांवर पॉपकॉर्न विक्रेते, कपड्यांचे स्टॉल, खाद्यपदार्थ विक्रेते यांचे अतिक्रमण असल्यामुळे नागरिकांना चालण्यासाठी कसरत करावी लागते. या समस्येवर कायमस्वरूपी तोडगा काढण्यासाठी महापालिकेने कठोर पावले उचलण्याची मागणी नागरिकांनी केली आहे.
‘सकाळ’च्या बातमीला प्रतिसाद
‘सकाळ’ने ‘अर्थपूर्ण संबंधांचे पुण्यावर अतिक्रमण’ या मथळ्याखाली वृत्त प्रकाशित केले होते. या बातमीला प्रतिसाद देताना पुणेकरांनी त्यांच्या भावना व्यक्त केल्या आणि प्रशासनाविरोधात रोष व्यक्त केला.
अतिक्रमणांमुळे वाहतुकीला अडथळा निर्माण होत असून, यावर वेळीच उपाययोजना न केल्यास समस्या गंभीर रूप धारण करेल, असा इशारा नागरिकांनी दिला आहे.
