पुणे: पोलीस कर्मचाऱ्याची आत्महत्या: बदलीमुळे तणावात?
पुणे, दि. ७ जून – शिवाजीनगर पोलीस वसाहतीत राहणाऱ्या आणि खडक पोलीस ठाण्यात कार्यरत असलेल्या पोलीस कर्मचारी सचिन हरीश्चंद्र सुर्वे (वय अंदाजे ४०) यांनी आपल्या राहत्या घरात गळफास घेऊन आत्महत्या केल्याची धक्कादायक घटना समोर आली आहे. शुक्रवारी (दि. ६ जून) दुपारी ही घटना घडली असून, त्यामुळे पुणे पोलीस दलात आणि सुर्वे यांच्या कुटुंबीयांमध्ये शोककळा पसरली आहे.
सुर्वे हे पोलीस वसाहतीतील नव्या इमारतीत राहत होते. सध्या त्यांची पत्नी व मुलगी गावी गेल्यामुळे ते घरी एकटेच होते. एकटे असतानाच त्यांनी टोकाचे पाऊल उचलल्याची प्राथमिक माहिती आहे. ही घटना उघडकीस येताच शिवाजीनगर पोलिसांनी तत्काळ घटनास्थळी धाव घेतली. मृतदेह ताब्यात घेऊन शवविच्छेदनासाठी ससून रुग्णालयात पाठवण्यात आला असून, आत्महत्येचे कारण अद्याप स्पष्ट झालेले नाही.
सुर्वे यांची अलीकडेच कोंढवा पोलीस ठाण्यात बदली झाल्याची माहिती असून, त्यामुळे मानसिक तणावात येऊन त्यांनी आत्महत्या केली असावी, अशी शक्यता वर्तवली जात आहे. मात्र, पोलीस अद्याप या बाबत स्पष्ट निष्कर्षाप्रत पोहोचलेले नाहीत. या प्रकरणी शिवाजीनगर पोलीस ठाण्यात अकस्मात मृत्यूची नोंद करण्यात आली आहे.
सचिन सुर्वे यांना एक मुलगी असून ती सध्या दहावीत शिक्षण घेत आहे. त्यांच्या आकस्मिक निधनाने कुटुंबीय आणि सहकाऱ्यांवर शोककळा पसरली आहे. पोलीस या प्रकरणाचा अधिक तपास करत असून, सुर्वे यांच्या सहकाऱ्यांचे व नातेवाईकांचे जबाब नोंदवण्याची प्रक्रिया सुरू आहे.
(समाप्त)
