पुणे: वाहतूक नियमन करत असताना पोलीस हवालदाराचा हृदयविकाराने मृत्यू; पुणे पोलिस दलात शोककळा
पुणे, ता. ९ : कर्तव्य बजावत असतानाच पुणे शहर वाहतूक पोलिस दलातील पोलीस हवालदाराचा हृदयविकाराच्या तीव्र झटक्याने मृत्यू झाल्याची दुर्दैवी घटना बुधवारी सायंकाळी घडली. कात्रज चौकातील भाजी मंडई परिसरात वाहतूक नियमन करत असताना धनाजी भरत वणवे (वय ४२) हे अचानक रस्त्यावर कोसळले आणि त्यांचा मृत्यू झाला.
वणवे हे भारती विद्यापीठ वाहतूक विभागात कार्यरत होते. सायंकाळी साधारण पावणेसात वाजण्याच्या सुमारास ड्युटीवर असताना त्यांना अचानक अस्वस्थ वाटू लागले आणि ते जमिनीवर कोसळले. उपस्थित सहकाऱ्यांनी त्यांना तात्काळ जवळील साईस्रेह रुग्णालयात दाखल केले. मात्र, उपचार सुरू होण्यापूर्वीच त्यांनी अखेरचा श्वास घेतला. डॉक्टरांच्या प्राथमिक निदानानुसार, त्यांचा मृत्यू तीव्र हृदयविकाराच्या झटक्याने झाला.
त्यांच्या पश्चात आई लोचना भरत वणवे, वडील भरत वामन वणवे, पत्नी रुपाली वणवे, मुलगी सिद्धी (वय १५) आणि मुलगा शिवराज (वय ४) असा परिवार आहे. त्यांच्या अकस्मात जाण्याने कुटुंबावर शोककळा पसरली आहे.
पोलीस आयुक्त अमितेश कुमार तसेच वरिष्ठ पोलीस अधिकाऱ्यांनी वणवे यांच्या निधनाबद्दल दुःख व्यक्त केले आहे. पुणे शहर पोलीस दल त्यांच्या कुटुंबाच्या दुःखात सहभागी असल्याचे त्यांनी नमूद केले.
वणवे यांच्या पार्थिवावर गुरुवारी त्यांच्या मूळ गावी फलटण तालुक्यातील निरा येथे अंत्यसंस्कार करण्यात येणार आहेत. त्यांच्या नातेवाईकांनी त्यांचे पार्थिव निरा येथे नेले आहे.
कर्तव्यावर असताना घडलेली ही घटना पोलिस दलासाठी अत्यंत दुःखद आणि धक्का देणारी ठरली आहे
