पुणे: आयुक्त बंगल्यात ‘चोरी’ नव्हे, फक्त चर्चेची साफसफाई! शहर अभियंत्यांच्या अहवालाने अफवांचा झुंबरच उतरवला
पुणे, दि. १९ (प्रतिनिधी)
महापालिका आयुक्तांच्या बंगल्यात कोट्यवधींचे साहित्य गायब झाल्याच्या चर्चेने शहरात जो धुरळा उडवला होता, तो अखेर शहर अभियंत्यांच्या अहवालाने बसला आहे. आयुक्त बंगल्यातून एकही वस्तू चोरीला गेलेली नाही, असा निर्वाळा देत प्रशासनाने अप्रत्यक्षपणे सांगितले आहे की चोरी नव्हती, होती ती फक्त चर्चा!
मॉडेल कॉलनीतील आयुक्त निवासस्थानातील झुंबर, ऐतिहासिक चित्रे, वातानुकुलित यंत्रणा, पितळी-कांस्य दिवे, एलईडी टीव्ही, कॉफी मेकर, वॉकीटॉकी, वॉटर प्युरिफायर अशा मौल्यवान वस्तू गायब झाल्याच्या बातम्यांनी जून महिन्यात शहरातील चर्चांना उधाण आले होते. माध्यमांतून “कोट्यवधींची चोरी” गाजली, स्वयंसेवी संस्था आणि राजकीय पक्षांनी तक्रारी, चौकशी आणि जबाबदारीची मागणी केली. मात्र, प्रशासनाच्या अहवालाने या साऱ्या गदारोळावर थंड पाणी टाकले आहे.
या प्रकरणाची चौकशी शहर अभियंता प्रशांत वाघमारे यांच्याकडे सोपवण्यात आली होती. भवन रचना, विद्युत, उद्यान, मध्यवर्ती भांडार आणि क्षेत्रीय कार्यालयांकडून माहिती मागवून सर्व विभागांनी एकमुखाने सांगितले—“काहीच गायब नाही.” म्हणजे झुंबरही जागेवर, दिवेही तिथेच, आणि अफवा मात्र हवेत!
अहवाल गोपनीय ठेवण्यात आल्याने संशयाचे ढग अधिक गडद झाले होते. “अहवाल लपवला जातोय का?” असा सवाल नागरिकांतून विचारला जात होता. सजग नागरिक मंचाचे अध्यक्ष विवेक वेलणकर यांनी सातत्याने अहवालाची मागणी लावून धरल्यानंतर अखेर महापालिकेने तो अहवाल दिला. त्यात आयुक्त निवासस्थानातील सर्व साहित्य सुरक्षित असल्याचे ठामपणे नमूद करण्यात आले आहे.
म्हणजे प्रश्न असा उरतो की, चोरीच झाली नव्हती तर एवढा गदारोळ का? माध्यमांची घाई, राजकीय आरोपांची स्पर्धा की प्रशासनाची संवादशून्यता—नेमकी चूक कुणाची?
एकीकडे “कोट्यवधींची चोरी” अशी चर्चा, तर दुसरीकडे “एकही वस्तू नाहीशी नाही” असा अहवाल—या दोन टोकांमध्ये सत्य हरवले की व्यवस्थेची विश्वासार्हता?
शेवटी प्रशासनाने दिलेला संदेश स्पष्ट आहे—
आयुक्त बंगल्यात वस्तू सुरक्षित होत्या; असुरक्षित होती ती फक्त चर्चा!
