पुणे मनपाच्या आरोग्य विभागात ‘गोलमाल’? वरिष्ठ अधिकाऱ्यांचे आदेशही धाब्यावर; अध्ययन रजा प्रकरणात संशयाचे धुके!

250px-Pune_Municipal_Corporation_building_in_October_2023.jpg

पुणे | दि. १२ जुलै – पुणे महापालिकेतील आरोग्य विभागात डॉ. प्रल्हाद पाटील यांना अध्ययन रजा मंजूर करताना नियमबाह्य प्रक्रियांचा अवलंब झाल्याचा गंभीर आरोप ज्येष्ठ नागरिक रमेश खामकर यांनी केला आहे. त्यांनी मनपा आयुक्तांकडे पाठवलेल्या निवेदनात प्रशासनातील अपारदर्शकतेबाबत तीव्र नाराजी व्यक्त केली आहे.

खामकर यांनी आपल्या पत्रात प्रश्न उपस्थित केला आहे की, “डॉ. पाटील यांच्या रजेच्या प्रक्रियेत आरोग्य प्रमुख यांची सहीच नसताना ही फाईल आयुक्तांकडे कशी गेली?” संबंधित PDF मध्येही आरोग्य प्रमुखाची सही नसलेल्या पत्रांचा उल्लेख असून, संपूर्ण प्रक्रिया ‘गुपचूप’पणे पार पडल्याचा आरोप त्यांनी केला आहे.

आरोग्य प्रमुखांच्या भूमिकेवर प्रश्नचिन्ह

“पुणे मनपात आरोग्य प्रमुख हे पद अस्तित्वात आहे की नाही?” असा थेट सवाल खामकर यांनी उपस्थित केला आहे. डॉ. पाटील यांच्या रजेच्या काळात त्यांची फाईल आरोग्य प्रमुखांची सही न घेताच मंजुरीसाठी पाठवली गेली, ही बाब खूपच संशयास्पद असल्याचे त्यांनी म्हटले आहे.

उपआयुक्तांच्या बैठकीत मांडलेले मुद्दे दुर्लक्षित

उपआयुक्त सपकाळ यांच्या अध्यक्षतेखाली झालेल्या बैठकीत रमेश खामकर यांनी मुद्देसूद प्रश्न मांडले होते. मात्र, त्या बैठकीच्या इतिवृत्तात त्याचा उल्लेख नाही, तसेच उपआयुक्तांची सहीही न घेतल्याचा आरोप करण्यात आला आहे. ही बाब संबंधित अधिकाऱ्यांनी मुद्दाम दुर्लक्ष केल्याचे सूचित करते.

अतिरिक्त आयुक्तांच्या आदेशालाही केराची टोपली

खामकर यांनी अतिरिक्त आयुक्त (ज) यांच्याकडे दिलेल्या निवेदनावर मुद्देनिहाय स्पष्टीकरण सादर करण्याचे स्पष्ट आदेश दिले होते. मात्र, आरोग्य विभागाने त्या आदेशाला थेट ‘केराची टोपली’ दाखवली. विशेष म्हणजे, स्वतःचे आदेश पाळले जात नसताना अतिरिक्त आयुक्तही या विषयात गप्प बसले आहेत, याकडे खामकर यांनी लक्ष वेधले आहे.

‘सब कुछ गोलमाल है भाई!’

“एकंदरीत डॉ. प्रल्हाद पाटील यांच्या अध्ययन रजा प्रकरणात मोठा झोल आहे. वरिष्ठ अधिकारीही न वाचता निमूट सही करत आहेत. आरोग्य विभागातील काही अधिकाऱ्यांच्या मनाप्रमाणेच सगळं चालतंय. कोणीच लक्ष द्यायला तयार नाही,” अशी खंत व्यक्त करत खामकर यांनी ‘सब कुछ गोलमाल है भाई!’ या शब्दांत व्यवस्थेवर ताशेरे ओढले आहेत.

– प्रतिनिधी
(या प्रकरणी पुणे महापालिकेकडून अधिकृत प्रतिक्रिया मिळालेली नाही.)

Spread the love