पुणे: येरवडा शास्त्रीनगर चौकात धक्कादायक प्रकार — चालू कारला अचानक भीषण आग – व्हिडिओ

पुणे, ता. 06 येरवडा येथील शास्त्रीनगर चौकात आज सकाळी एक हादरवून टाकणारी घटना घडली. चालू असलेल्या कारला अचानक भीषण आग लागल्याने पाहणाऱ्यांमध्ये घबराट पसरली. आगीची तीव्रता एवढी होती की काही क्षणांत वाहन पूर्णपणे जळून खाक झाले.

पहा व्हिडिओ

मिळालेल्या माहितीनुसार, कार शास्त्रीनगर चौकातून जात असताना अचानक इंजिन विभागातून धूर निघू लागला. काही सेकंदांतच वाहनाने पेट घेतला. प्रसंगावधान राखत चालकाने तात्काळ कार थांबवून बाहेर पडत जीव वाचवला. सुदैवाने या घटनेत कोणतीही जखमी किंवा जीवितहानी झाली नाही.

दरम्यान, नागरिकांनी तत्काळ अग्निशामक दलाला माहिती दिली. काही मिनिटांतच पथक घटनास्थळी दाखल झाले आणि आगीवर नियंत्रण मिळवले. मात्र तोपर्यंत वाहन संपूर्ण जळून खाक झाले होते.

या घटनेमुळे परिसरात काही काळ वाहतूक कोंडी झाली. आग लागण्याचे नेमके कारण अद्याप स्पष्ट झाले नसून प्राथमिक अंदाजानुसार वाहनातील तांत्रिक बिघाडामुळे आग लागल्याची शक्यता वर्तविण्यात येत आहे. पोलिस व अग्निशमन विभागाकडून अधिक तपास सुरू आहे.