लाडक्या बहिणीसाठी 2100 रुपयांची योजना – दादांचा नवा वादा, राष्ट्रवादीचा जाहीरनामा

पुणे: निवडणुकीच्या पार्श्वभूमीवर राज्यात विविध पक्ष आपापले जाहीरनामे प्रसिद्ध करत आहेत, आणि आज राष्ट्रवादी काँग्रेसचे नेते अजित पवार यांच्या नेतृत्वाखाली पक्षाचा जाहीरनामा सादर झाला आहे. या जाहीरनाम्यात विशेषतः महिलांसाठी “लाडकी बहीण” योजनेत मोठी आर्थिक वाढ जाहीर करण्यात आली आहे.

लाडकी बहीण योजनेअंतर्गत महिलांना आता दरमहा मिळणारी रक्कम 1500 रुपयांवरून वाढवून 2100 रुपये करण्यात येणार असल्याचे जाहीरनाम्यात नमूद करण्यात आले आहे. पक्षाचे प्रदेशाध्यक्ष सुनील तटकरे यांनी जाहीरनामा प्रसिद्ध करताना सांगितले की, महायुती सरकारच्या काळात केलेल्या कामांची माहिती लोकांपर्यंत पोहोचवण्याचे कार्य सुरू आहे. मागील चार महिन्यांत आम्ही काही महत्त्वाच्या योजना सुरू केल्या आहेत, ज्यात लाडकी बहीण योजना आणि आर्थिक दुर्बल घटकातील मुलींसाठी शैक्षणिक सहाय्य यासारख्या योजना समाविष्ट आहेत. या योजनांना चांगला प्रतिसाद मिळत आहे, आणि आम्ही स्थानिक पातळीवरही जाहीरनामे प्रकाशित करत आहोत.

तटकरे पुढे म्हणाले की, तालुका पातळीवर आमदारांच्या कामांचा आढावा घेतला जाईल आणि यासाठी विशेष टोल-फ्री हेल्पलाइन क्रमांक 9861717171 सुरू करण्यात आला आहे, ज्यावर तालुकास्तरीय जाहीरनाम्याची माहिती मिळू शकेल. लाडकी बहीण योजनेत सुधारणा करताना, आता 2 कोटी 30 लाख महिलांना 2100 रुपयांचा लाभ मिळणार आहे.

जाहीरनाम्याचे मुख्य मुद्दे:

लाडकी बहीण योजना: महिलांना दरमहा 2100 रुपये देण्याची घोषणा.

महिला सुरक्षेसाठी: 25 हजार महिलांना पोलिस दलात भरती करण्याचा वादा.

धान उत्पादक शेतकऱ्यांसाठी: हेक्टरी 25 हजार रुपये आर्थिक मदत.

ग्रामीण विकास: 45,000 पाणंद रस्ते निर्माण करण्याचे आश्वासन.

शेतकऱ्यांसाठी: कर्जमाफी व शेती पिकांच्या MSP वर 20% अनुदान देण्याचे वचन.

वीज बिलात सवलत: 30% सवलत, सौर ऊर्जा व अक्षय ऊर्जा क्षेत्राला प्राधान्य.

वृद्ध पेन्शन: वृद्ध पेन्शनधारकांसाठी रक्कम वाढवून 1500 वरून 2100 रुपये.

विद्यार्थ्यांसाठी: दहा लाख विद्यार्थ्यांना प्रशिक्षणातून महिन्याला दहा हजार रुपये विद्यावेतन.

रोजगार निर्मिती: 25 लाख रोजगाराच्या संधी उपलब्ध करण्याचे वचन.


राष्ट्रवादीच्या या जाहीरनाम्यात महिलांसह शेतकरी, विद्यार्थी, वृद्ध आणि बेरोजगारांसाठी अनेक लोकोपयोगी योजना प्रस्तावित करण्यात आल्या आहेत.