पुणे: वडगावशेरीत राष्ट्रवादी विरुद्ध राष्ट्रवादी; पठारे यांची पदयात्रा, टिंगरे यांच्याशी थेट लढत
पुणे : वडगावशेरी विधानसभा मतदारसंघात आगामी निवडणुकीसाठी प्रचार शिगेला पोहोचला असून राष्ट्रवादीच्या दोन गटांमध्ये चुरशीची लढत पाहायला मिळत आहे. अजित पवार गटाकडून सुनील टिंगरे आणि शरद पवार गटाकडून बापूसाहेब पठारे यांच्यात थेट मुकाबला होणार आहे, ज्यामुळे मतदारसंघातील निवडणूक रंगतदार होणार आहे.
काल (दि. १२) बापूसाहेब पठारे यांनी पदयात्रा काढत यशवंत नगर, राघवेंद्र नगर, तुकाराम नगर, शेजवळ पार्क, सोनई पार्क, विडी कामगार परिसरात जनसंपर्क केला. या पदयात्रेदरम्यान नागरिकांनी पठारे यांचे उत्स्फूर्त स्वागत केले, तसेच मोठ्या जनसमुदायाच्या उपस्थितीत त्यांच्याशी संवाद साधला.
पदयात्रेदरम्यान पठारे म्हणाले, “वडगावशेरीची प्रगती साधण्यासाठी नागरिकांचा आशिर्वाद हवा आहे. मतदारसंघातील विविध भागात भेट देत नागरिकांशी थेट संवाद साधला आणि त्यांच्या प्रेमाने व समर्थनाने भारावून गेलो आहे. या स्वागतातून आणि संवादातून आमचा आत्मविश्वास वाढत आहे.”
राष्ट्रवादीच्या दोन्ही गटांत सुरू असलेली ही लढत अधिकच रंगतदार बनत चालली असून, वडगावशेरीत कोण बाजी मारणार, हे पाहणे उत्सुकतेचे ठरणार आहे.
