पुणे: हनीट्रॅपचा सापळा! मिठाई विक्रेत्याकडून ७० हजारांची खंडणी; स्नेहा कदमला अटक; फेसबुकवरील ओळख ठरली महाग; फरासखाना पोलिसांची कारवाई

पुणे – सोशल मीडियावरील ओळख एका नामांकित मिठाई विक्रेत्याला चांगलीच महागात पडली आहे. फेसबुकवर झालेल्या ओळखीतून एका महिलेने व्यावसायिकाला हनीट्रॅपमध्ये अडकवून तब्बल ७० हजार रुपयांची खंडणी उकळल्याचा प्रकार उघडकीस आला आहे. फरासखाना पोलिसांनी या प्रकरणात स्नेहा मोहीत कदम (वय ३०, रा. सांगली) या महिलेला अटक केली आहे.

या प्रकरणी ४५ वर्षीय मिठाई विक्रेत्याने फिर्याद दिली असून, पोलिसांनी कलम ३८४ (खंडणीसाठी धमकी) आणि संबंधित कलमांखाली गुन्हा दाखल केला आहे.

घटना कशी घडली?
फिर्यादींचे लक्ष्मी रोडवरील सोन्या मारुती चौकात मिठाईचे दुकान आहे. फेसबुकवर स्नेहा कदम या महिलेशी त्यांची ओळख झाली. काही दिवसांनंतर स्नेहाने २४ सप्टेंबर रोजी ४ हजार रुपये उधार मागितले. फिर्यादींनी गुगल पे द्वारे पैसे पाठविले. त्यानंतर २५ सप्टेंबर रोजी स्नेहाने त्यांना कोरेगाव पार्क येथील एका हॉटेलवर भेटायला बोलावले.

रात्री उशिरा भेट झाल्यानंतर स्नेहाने बहिणीच्या घरी जाण्याचे सांगताच, फिर्यादींनी तिच्यासाठी हॉटेलचे रूम बुक केले. त्यानंतर काही वेळाने स्नेहाने दुकानातील गल्ल्यातील पैसे आणि मिठाईचे बॉक्स घेऊन निघून गेली. पुढे तिने फोन करून “हे प्रकरण मिटवायचे असेल तर दोन लाख रुपये दे” अशी मागणी केली.

खंडणीची मागणी आणि सापळा
वारंवार होणाऱ्या धमक्यांना कंटाळून मिठाई विक्रेत्याने पोलिसांकडे धाव घेतली. पोलिसांनी सापळा रचला असता स्नेहाला पोलिसांची चाहूल लागली आणि ती पसार झाली. दरम्यान, तिने गुगल पे द्वारे दोन लाखांची मागणी करत २५ हजार रुपये आधीच घेतले होते.

तांत्रिक विश्लेषणाद्वारे तिचा ठावठिकाणा शोधून काढण्यात आला. अखेर ती नदीपात्राजवळ लपलेली असताना फरासखाना पोलिसांनी तिला ताब्यात घेतले.

पोलिसांचे वक्तव्य
“ब्लॅकमेल करून पैशांची मागणी करणाऱ्या महिलेच्या त्रासाला कंटाळून तक्रार दाखल करण्यात आली होती. स्नेहा कदमला ताब्यात घेऊन पुढील तपास सुरू आहे,” अशी माहिती सहाय्यक पोलिस निरीक्षक शीतल जाधव यांनी दिली.

🔸 तपास अधिकारी – एपीआय शीतल जाधव, फरासखाना पोलीस ठाणे
🔸 खंडणीची एकूण मागणी – २ लाख रुपये
🔸 वसूल रक्कम – सुमारे ७० हजार रुपये (गुगल पे व्यवहार)